Dy vite më parë Ilir Meta ka zbuluar një mesazh që sipas tij kryeministri Edi Rama i kishte dërguar nëpërmjet telefonit.
Referuar pretendimeve të Metës, shefi i qeverisë e paralajmëronte se pas largimit nga detyra si kreu i shtetit nuk do të gjente më gjurmë të partisë së tij Lëvizja Socialiste për Integrim.
“Shpirti im e di, se ca kam hequr unë për të shpëtuar LSI nga asgjësimi i marrëveshjes së 17 majit.
Ça më shkruan ky (Rama), nuk e kam zakon por do i nxjerrim mesazhet. Më 18 shkurt me shkruan: Lulit i kam shkuar në fund të 2017 se pas zgjedhje lokale nuk do jetë kryetar partie, ndërsa ty po të shkruaj se pasi të mbarosh mandatin si President nuk do gjesh më gjurmë LSI.
Pra i vjen keq edhe për mua edhe Lulit, mua kur nuk më erdhi keq për ditët e mia në PS në ditët e mia më të zeza, që Edi i gjuante me gurë, e bënte pis atë, nuk më vjen keq as për LSI se e bëra për të dhënë mundësi të rinjve si Gjosha, Panariti, Mehmeti të bëjnë diçka të mirë për vendin”, tha asaj kohe me tone të ashpra presidenti Meta.
Ndërkohë, teksa kanë kaluar dy vite Lëvizja Socialiste për Integrim thuajse ka humbur pjesën më të madhe të territorit ku gëzonte një lloj mbështetje.
Në zgjedhjet e 25 prillit, partia e presidentit ka shënuar një bilanc tejet negativ që u konvertua vetëm në 4 mandate deputetësh. (TemA)
