Për më shumë se dy muaj, Shoqata e Ruajtjes e Mbrojtjes së Mjedisit Natyror në Shqipëri (PPNEA) vëzhgoi përmes kamerave kurth, botën e kafshëve të egra në zonën e Munellës.

Në fotot e përcjella nga PPNEA shihet rrëqebulli i ballkanit (Lynx lynx balcanicus), një specie e rrallë që ka një popullsi fare të vogël dhe në rrezik zhdukje (për shkak të gjuetisë së paligjshme). Kamerat kanë dhe prezencën e maceve të egra, arinjve, derrave e të tjerë kafshëve të egra.

Postimi i plotë i PPNEA:

Për më tepër se 60 ditë, kamerat kurth të PPNEA qëndruan të aktivizuara në zonat me potencialin më të madh për të strehuar një nga nënllojet më të veçantë e të rrezikuar në të gjithë botën, rrëqebullin e Ballkanit (Lynx lynx balcanicus).

Po njësoj si vitet e kaluara u dokumentua prania e rrëqebullit në habitatet e vërtetuara më parë nga PPNEA. Prania e këtij nënlloji në Malin e Munellës është tashmë e vazhdueshme që prej vitit 2011, duke na treguar se ky habitat strehon një popullatë të vogël e cila ndodhet në një presion të jashtëzakonshëm nga gjuetia e paligjshme, mungesa e gjahut, prerja e pyjeve, etj.

Nga vlerësimi paraprak i të dhënave të grumbulluara rezulton se frekuenca e fotografimit për lloje të ndryshëm të faunës së egër është më e ulët se vitet e mëparshme; një indikator i rritjes së kërcënimeve ndaj jetës së egër.

Ekipi ynë falenderon të gjithë ata që ndihmuan gjatë këtij procesi, si stafin e AdZM Elbasan, anëtarët e rinj të ekipit #BLRP, apo edhe vullnetarë e mbështetës të PPNEA.

Shpërndajini këto copëza nga jeta e egër e Shqipërisë, të gjithë ne duhet ti njohim e mbrojmë vlerat natyrore të vendit tonë!

Subscribe kanalin tonë në Youtube për të mos humbur asnjë video të re