Janë mbi gjysmë milioni njerëz në SHBA të infektuar nga koronavirusi, sipas Worldometers. Në 24 orët e fundit janë raportuar mbi 2100 të vdekur në të gjitha shtetet, ndërkohë janë 33 752 raste të reja me COVID-19.
Në total, numri i personave të prekur është 502 876. Të shëruar janë 27,314 persona dhe viktima nga koronavirusi 18,747.
New Yorku mbetet shteti më i prekur me 172,358 raste. Ndërkohë Presidenti amerikan Donald Trump tha të premten se vendi po afron pikun e infeksioneve me koronavirus dhe se numri i rasteve po sheshohet.
Ai tha gjithashtu se numri i viktimave në SHBA do të jetë më i ulët se 100 mijë, parashikimi i mëparshëm i Shtëpisë së Bardhë.
Zyrtarët paralajmërojnë për rrezikun e përfundimit të masave për distancimin shoqëror: Nëse SH.B.A. përfundon distancimin shoqëror dhe strategjitë e tjera për parandalimin e koronavirusit deri më 1 maj, siç ka thënë Presidenti Donald Trump, numri i personave të infektuar do të rritet.