Edhe këtë të mërkurë, ashtu si të martën, në vendin tonë janë regjistruar 25 raste të reja në 24 orë.
Në këtë mënyrë, numri total i të infektuarve ka shkuar në 634. Sipas zëvendësministres së Shëndetësisë, Mira Rakacolli, shifrat janë konstante.
“Gjatë 24 orëve të fundit janë testuar 252 persona të dyshuar me COVID-19. Nga rezultatet e testimeve janë konfirmuar 25 raste pozitive me COVID19. Vijon hetimi epidemiologjik dhe gjurmimi i kontakteve në Krujë ku kanë rezultuar 18 raste pozitive, ndërsa rastet e tjera janë 3 në Tiranë, 2 raste në Elbasan, 1 rast në Shkodër, 1 rast në Kurbin. Deri në këto momente janë testuar 6269 raste të dyshuara dhe prej tyre janë të konfirmuar pozitivë me COVID-19, 634 raste.”
Të infektuar aktivë në Shqipëri kemi 251 persona, një numër më i vogël se ai i të shëruarve, që është 356.
Ndërkohë, numri i pacientëve në gjendje të rëndë ka pësuar ulje, vetëm tetë të infektuar marrin shërbim në kujdesin intensiv.