Këtë të diel pati një rënie të ndjeshme të numrit të të infektuarve në vend, krahasuar me një ditë më parë.
Marjeta Dervishi nga Instituti i Shëndetit Publik njoftoi se në 24 orët e fundit janë testuar 264 persona dhe se vetëm 14 prej tyre kanë dalë të infektuar.
Nga rastet e reja, katër i përkasin Tiranës, nga ku një ndodhet në burg, nëntë Krujës dhe një Shkodrës.
“Si çdo ditë, ju bëjmë me dije rezultatet e 24 orëve të fundit sa i takon gjurmimit dhe hetimit epidemiologjik dhe situatën e deritanishme të përhapjes së COVID-19. Gjatë 24 orëve të fundit janë testuar 264 persona të dyshuar me COVID-19. Nga rezultatet e testimeve janë konfirmuar 14 raste pozitive me COVID19. Vijon hetimi epidemiologjik nga ku rezulton se në Krujë janë zbuluar 9 raste të reja, 4 raste pozitive janë në Tiranë, mes të cilëve një në institucionin e vuajtjes së denimit, dhe 1 rast i ri është në Shkodër. Deri në këto momente janë testuar 7279 raste të dyshuara dhe prej tyre janë të konfirmuar pozitivë me COVID-19, 726 raste.”
Këtë të diel ndërroi jetë edhe një tjetër pacient 60-vjeçar i shtruar në spitalin COVID-2, duke e çuar numrin total të viktimave në vend në 28.