Instituti Kombëtar i Shëndetësisë Publike të Kosovës (IKSHPK) ka njoftuar se janë konfirmuar edhe 4 raste të reja me koronavirus në vend.
Numri i të infektuarve me koronavirus ka shkuar në 860 në total.
Laboratori i Mikrobiologjisë Molekulare në IKSHPK sot ka testuar 324 mostra, prej të cilave 4 kanë rezultuar pozitive.
“Me SARS-CoV-2, janë diagnostikuar katër (4) raste. Rastet pozitive janë raste kontakti nga: komuna e Prizrenit 2 raste (sipas vendbanimit: 1 rast Prizren, 1 rast Zhur), një 1 rast me vendbanim në Rahovec dhe një 1 rast Leposaviq”, ka njoftuar IKSHPK.
Instituti po ashtu ka bërë të ditur se janë shëruar edhe 43 persona të prekur nga koronavirusi.
