Bashkimi Evropian, nën presion për shkak të një fushate të ngadaltë vaksinimi, ka nënshkruar gjashtë kontrata me prodhuesit e vaksinave kundër COVID-19: tre janë miratuar, por prodhimi i tyre është ngadalësuar ndjeshëm, raporton AFP.
Komisioni Evropian, i cili po negocion në emër të 27 vendeve anëtare, ka para-porositur një total prej 2.2 miliardë doza. Vendeve u takon të finalizojnë porositë dhe të organizojnë shpërndarjen e dozave.
Vaksina e dyshes gjermano-amerikane BioNTech-Pfizer është e para që u miratua nga rregullatori evropian në fund të dhjetorit, e ndjekur nga vaksina amerikane Moderna në 6 janar, dhe më pas suedezo-britanikja AstraZeneca në 29 janar. Të tre vaksinat jepen në dy doza, kështu që nevojiten dy doza për secilin person.
Deri më 1 shkurt, Bashkimi Evropian ka marrë 18.5 milion doza, nga të cilat 17.6 milion nga Pfizer / BioNTech dhe 854,000 nga Moderna. Në përgjithësi, 27-shja injekton mesatarisht 2.4 doza për 100 njerëz, me ndryshime të konsiderueshme midis shteteve.
Pfizer / BioNTech
Kontrata e parë e nënshkruar këtë vjeshtë parashikonte shpërndarjen e 200 milion dozave deri në shtator 2021 dhe 100 milion doza pak më vonë. Kontrata e dytë u nënshkrua në 8 janar për 300 milion doza shtesë, dorëzimi i të cilave është vendosur të fillojë në tremujorin e dytë.
BioNTech dhe Pfizer konfirmuan të hënën se ata janë të aftë të dërgojnë 75 milion doza të tjera në BE në tremujorin e dytë.
Moderna
Në janar, vendet anëtare njoftuan lajmet për një ulje të konsiderueshme të dërgesave të vaksinave Moderna të prodhuara në Zvicër.
Por, ashtu si me Pfizer / BioNTech, afatet e prodhimit janë përmbushur, Brukseli tha: 4 milion doza u dorëzuan javën e kaluar, nga të cilat 3.5 ishin BioNTech dhe 500,000 Moderna, e cila është “100 përqind e sasisë së pritur në këtë periudhë”.
AstraZeneca
Laboratori tha më 22 janar se kishte një problem “në prodhim” në uzinën në Seneffe (Belgjikë), duke i thënë BE se do të ishte në gjendje të jepte vetëm 31 milion nga 120 milion dozat e premtuara në tremujorin e parë. Furnizimi i 27-shes do të sigurohej nga një fabrikë tjetër në Hollandë dhe dy në Mbretërinë e Bashkuar.
Presidentja e Komisionit Evropian Ursula von der Leyen tha të dielën se AstraZeneca përfundimisht do të jepte 40 milion doza në tremujorin e parë, shumë poshtë parashikimeve.
Vaksina AstraZeneca është më e lehtë për t’u prodhuar dhe më e leverdishme për t’u shpërndarë, pasi e nuk kërkon temperatura shumë të ulta si Pfizer / BioNTech dhe Moderna. Zbatimi i tij në BE fillon në javën e dytë të shkurtit.
Në pritje të miratimit
Bashkimi Evropian gjithashtu ka nënshkruar kontrata me kompaninë francezo-britanike Sanofi-GSK (300 milion doza), me gjermanen CureVac (405 milion doza) dhe amerikanen Johnson & Johnson (400 milion doza).
Sipas Komisionit, rreth 100 milion doza të vaksinës Johnson & Johnson mund të dorëzohen deri në fund të shtatorit nëse miratohet.
Përveç kësaj, ekzekutivi i BE përfundoi negociatat në parim me Novavax-in amerikan (100 milion doza) dhe Valneva-n francezo-austriake (60 milion doza).
Çmimi i vaksinave
Çmimet e rëna dakord nga Komisioni, të cilat janë rreptësisht konfidenciale, u zbuluan pa dashje nga Sekretari i Shtetit për Buxhetin në Belgjikë në mes të dhjetorit: çmimi i një doze varion nga 1.78 euro për vaksinën AstraZeneca në 14.70 euro për Moderna-n. Pfizer / BioNTech kushton 12 euro.
AstraZeneca vlerësoi se vlera totale e vaksinës për BE-në është 870 milion euro, gjë që mund të shihet në kontratën që Komisioni publikoi në Internet të premten.