Kryetari i Komisionit të Ligjeve, Ulsi Manja ka komentuar deklaratën e presidentit Ilir Meta, i cili pak ditë më parë tha kush prek votën, do ti pritet dora.
Manja tha se Meta së pari duhet ta adresojë këtë thirrje tek partia e gruas së tij Monika Kryemadhit, tek LSI-ja. Sipas tij, PS ka bërë gjithçka për të garantuar votën e lirë dhe se kjo gjë i është besuar SPAK-ut.
“Në fakt PS ka bërë gjithçka për të garantuar votën e lirë. E ftoj presidentin që të njëjtën thirrje për të prerë dorën, ta dorëzojë tek partia e Kryrmadhit. Shqipëria sot ka mekanizmat e duhura për të garantuar votën e lirë. SPAKU-t i kemi besuar procesin e garantimit të votës së lirë. Këtë thirje Meta duhet ta bëjë për partinë e tij LSI. Duart e prera do të jenë në kampin tjetër. Tek PS nuk do të ketë as njollosje dhe as prerje duarsh”, u shpreh Ulsi Manja në Report Tv.
Kujtojmë që pak ditë më parë presidenti Ilir Meta tha në një intervistë se kushdo prek votën do t’i pritet dora, deklaratë kjo e cila ngjalli reagime të shumta nga aktorët politikë e jo vetëm.
Ndërkohë fjalët e Ulsi Manjës vijnë një ditë pasi kandidatit të LSI-së Sokol Skura, i doli një video e publikuar nga ‘Fiks Fare’, ku shihej duke bërë pazare për shitblerje votash. Ky i fundit e mohon një gjë të tillë, duke pretenduar se janë të gjitha inskenime për të mos lejuar kandidimin e tij në zgjedhjet e 25 prillit.