Pas marrjes së kontrollit të Aganistanit nga talebanët, Rusia po hedh një vështrim të kujdesshëm drejt jugut për të parë se si mund të përfitojë nga një situatë e mbushur me mundësi dhe rrezik.
Edhe pse zyrtarisht i etiketon talebanët si një organizatë terroriste, Rusia ka vite që është e angazhuar me udhëheqësit e saj, madje i ka ftuar ata në Moskë.
Ndërsa vendet perëndimore e shikojnë me ankth largimin e Shteteve të Bshkuara dhe NATO-s, Moska ka patur një ton më të butë. I dërguari i Rusisë në OKB, Vassily Nebenzia, foli në Këshillin e Sigurimit një ditë pasi talebanët morën Kabulin.
“Aktualisht, ne besojmë se nuk ka kuptim të ketë panik. Gjëja kryesore është se është shmangur një gjakderdhje e gjerë mes civilëve. U bëjmë thirrje të gjitha palëve afgane që të përmbahen nga armiqësitë dhe të nxisin një zgjidhje paqësore”.
Moska ndërhyri në Afganistan në vitin 1979. Trupat e saj e pushtuan atë vend për të mbështetur një qeveri komuniste, që luftonte kundër rebelëve islamikë, të njohur si muxhahedinë.
Ndërhyrja, që supozohej të ishte një operacion i shpejtë ushtarak, zgjati gati një dekadë. Menjëherë pas tërheqjes sovjetike, regjimi komunist u rrëzua. Aktualisht Moska po mban një qëndrim më pragmatist.
Mark Simakovsky, analist në Këshillin e Atlantikut, foli me Zërin e Amerikës përmes rrjetit Skype.
“Moska është shumë e etur për të përfituar nga boshllëku i krijuar dhe është në terren. Ata nuk do ta tërheqin ambasadën e tyre. Besoj se ka mundësi që do të jetë ndër vendet e para që do të njohë talebanët, megjithëse mendoj se jemi shumë larg kësaj.”
Rusia është gjithashtu e prirur të parandalojë eksportin e ekstremistëve dhe luftëtarëve islamikë në Azinë Qendrore. Moska shpreson se talebanët do të frenojnë futjen e drogës në rajonin e saj.
Ndërkohë, tërheqja amerikane ka qenë një dhuratë për propagandën e Moskës, thotë për Zërin e Amerikës analisti Mark Simakovsky me Këshillin e Atlantikut.
“Për Rusinë, Afganistani ka rëndësi në arenën ndërkombëtare si një shfaqje e dobësisë së Shteteve të Bashkuara. Por kjo sherben edhe si pikë orientimi për Rusinë dhe shembull i përpjekjeve të saj në vende si Ukraina, Venezuela apo gjetkë.”
Moska duket se shpreson të mbushë vakumin e krijuar nga largimi i Shteteve të Bashkuara për të rritur ndikimin e saj rajonal.
(E.H/Faxweb.al)
…
/faxweb