Tre viktima u shkaktuan si pasojë e tre aksidenteve të ndryshme dy ditë më parë në Bulqizë e Dibër. I pari ndodhi në një nga rrugët e galerive të kromit në Krastë të Martaneshit, ku si pasojë e daljes nga rruga të automjetit tip Land Rover humbi jetën një 60 vjeçar.
Pasditën e së Enjtes si pasojë e reshjeve të shumta të shiut një mjet goditi një këmbësor rreth 50 vjeç në fshatin Grezhdan, i cili edhe pse u dërgua në spital nuk arriti t’i mbijetonte plagëve të marra.
Pak minuta nga aksidenti i Grezhdanit një tjetër aksident u shënua në fshatin Vojnik në hyrje të Maqellarës, ku një mjet tip furgon pasagjeresh përplasi një 70 vjeçar i cili humbi jeten në vend.
Duke marrë shkas nga këto tre ngjarje të rënda brenda një dite, Policia e Dibrës prej dy ditësh të ka zhvendosur të gjitha shërbimet e policisë rrugore në aksin nacional Peshkopi – Bulqizë për sensibilizimin e drejtuesve të automjeteve dhe të këmbësorëve për tu treguar të kujdesshëm gjatë përdorimit të rrugës.
Sipas policisë së Dibrës, kontrollet do të jenë intensive gjatë gjithë muajit Gusht i cili pritet të ketë një numër më të madh mjetesh që do të përdorin rrugët për shkak edhe të sezonit të plazhit.
