Kryeministri i Sudanit, Abdalla Hamdok, dje dha dorëheqje në vazhdën e ngërçit politik dhe protestave mbarëkombëtare pro-demokracisë që çuan në një reagim të dhunshëm nga organet e sigurisë.
Në një fjalim televiziv, Hamdok pranoi se partneriteti midis ushtrisë dhe udhëheqjes civile ka dështuar të çojë drejt tranzicionit dhe vendosjes së themelit për sundimin civil dhe transformimin demokratik.
“E pranova postin e kryeministrit në gusht 2021 bazuar në deklaratën kushtetuese dhe konsensusin politik ndërmjet komponentëve ushtarakë dhe civilë, një model që e vlerësova në disa raste. Por kjo nuk arriti të vazhdojë me të njëjtën harmoni si kur filloi”, tha Hamdok në fjalimin e tij drejtuar kombit.
“Unë u përpoqa të drejtoja vendin tonë për të shmangur rreziqet e rrëshqitjes drejt një fatkeqësie dhe tani kombi ynë po kalon aktualisht një pikë kthese të rrezikshme që mund të kërcënojë mbijetesën e tij”, paralajmëroi ai.
“I thashë ushtrisë sonë kombëtare, Forcave të Mbështetjes së Shpejtë, policisë dhe shërbimit të inteligjencës se kombi është fuqia më e lartë sovrane dhe ushtria i përket atij, duke punuar nën komandën e kombit për të siguruar jetën, unitetin dhe territoret e tij”, shtoi ai.
Dorëheqja e Hamdokut vjen mes një krize dhe protestave mbarëkombëtare kundër grusht shtetit të organizuar nga ushtria më 25 tetor të vitit të kaluar.
Hamdok nënshkroi një marrëveshje me ushtrinë më 21 nëntor për të shpëtuar periudhën e tranzicionit të vendit dhe për t’u kthyer në deklaratën kushtetuese, një pjesë e së cilës u pezullua nga grushti i shtetit.