Shumë ditë pa reshje shiu kanë ngritur shqetësimin se Italia po përballet me një tjetër thatësirë pas situatës alarmante të verës së kaluar.
Shkencëtarët dhe grupet mjedisore kanë përcaktuar se arsyeja kryesore është se Alpet kanë marrë më pak se gjysmën e sasisë së zakonshme të borës këtë vit.
Venecia, ku problemi kryesor është shfaqja e shpeshtë e përmbytjeve, këto ditë po përballet me nivele jashtëzakonisht të ulëta uji që e bëjnë të pamundur lundrimin e gondolave, taksive të ujit dhe mjeteve të emergjencës nëpër kanalet e famshme.
Mungesa e shiut, presioni i lartë i ajrit, hëna e plotë dhe rrymat detare janë shkaku kryesor i thatësirës që goditi Venedikun.
Shoqata për mbrojtjen e mjedisit Legambiente njoftoi të hënën, më 20 shkurt, se lumenjtë dhe liqenet italiane po vuajnë nga mungesa serioze e ujit dhe se rajonet veriore të vendit janë veçanërisht të rrezikuara.
“Lumi më i gjatë italian, Po, i cili rrjedh nga Alpet në veriperëndim deri në Adriatik, ka 61 për qind më pak ujë se zakonisht në këtë periudhë të vitit”, thuhet në njoftim.
Kujtojmë se në korrik 2022, Italia pësoi thatësirën më të keqe në 70 vitet e fundit dhe se gjendja e jashtëzakonshme u shpall rreth lumit Po, i cili përbën afërsisht një të tretën e prodhimit bujqësor të vendit.
“Situata e mungesës së ujit filloi në dimrin e 2020/2021 dhe që atëherë problemi është rritur. Na duhen 50 ditë shi për të kompensuar 500 mm në rajonet veriperëndimore,” tha eksperti i klimës Massimiliano Pascui nga instituti i kërkimit shkencor italian CNR.
Krahas situatës shqetësuese në Venecia, niveli i ujit në liqenin Garda ka rënë në një nivel të ulët rekord, gjë që ka bërë të mundur arritjen në këmbë në ishullin e vogël San Biagio. /tesheshi.com/