Aktivistja italiane antifashiste Ilaria Salis është liruar nga arresti shtëpiak në Budapest pasi u zgjodh në Parlamentin Evropian këtë fundjavë, tha avokati i saj Gyorgy Magyar për Reuters të premten.
Anëtarët e Parlamentit Evropian gëzojnë imunitet të fortë ligjor nga ndjekja penale, edhe nëse akuzat kanë të bëjnë me vepra të kryera para se të zgjidheshin.
Ilaria Salis, një mësuese 39-vjeçare, është akuzuar në Hungari se ka marrë pjesë në sulmet e një grupi antifashist ndaj njerëzve që ata i konsideronin aktivistë të së djathtës ekstreme.
Policia ka hequr tashmë byzylykun elektronik nga kyçi i saj, tha avokati.
Babai i Ilaria Salis pritet të mbërrijë në Budapest më vonë gjatë ditës për ta marrë atë në Itali, shtoi Magyar.
Një çështje e ndjeshme politike
Salis ndodhet në paraburgim në Hungari prej më shumë se një viti për shkak të rastit që bëri që “Aleanca e Gjelbër dhe e Majtë” italiane ta propozonte atë si një nga kandidatet e saj në zgjedhjet europiane.
Rasti i saj ngjalli zemërim në Itali në shkurt, pasi ajo u soll në gjykatë me duar dhe këmbë të lidhura dhe një zinxhir rreth belit.
Çështja është e ndjeshme politikisht për shkak të lidhjeve të gjata midis kryeministres së krahut të djathtë të Italisë Giorgia Meloni dhe kryeministrit hungarez Viktor Orbán.
Njëherësh, rasti i saj ngjan me atë të Fredi Belerit te ne, i cili gjithashtu u zgjodh në Parlamentin Europian nga kryeministri Mitsotakis, në një lëvizje të tij kundër qeverisë shqiptare, duke pretenduar se Beleri është në burg pikërisht nga Rama.
Por ndryshe italiania, fituesi i zgjedhjeve në Himarë vijon të mbetet në burg nën akuzën e shitblerjes së votës.