Sekretari amerikan i Mbrojtjes, Lloyd Austin ka urdhëruar vendosjen e një nëndetëse me raketa të drejtuara në Lindjen e Mesme, tha Pentagoni të dielën, pasi vrasja e anëtarëve të lartë të Hamasit dhe Hezbollahut e ka bërë rajonin të përgatitur për sulme të mundshme nga Irani dhe aleatët e tij.
Megjithëse “USS Georgia”, një nëndetëse me energji bërthamore, ishte tashmë në Detin Mesdhe në korrik, sipas një postimi të ushtrisë amerikane në mediat sociale, vendosja e nëndetëses rrallë bëhet publike.
Në një deklaratë pas bisedimeve të Austin me homologun e tij izraelit, Pentagoni tha se Austin kishte urdhëruar grupin sulmues “Abraham Lincoln” të përshpejtonte dislokimin e tij në rajon.
“Ministri Austin përsëriti përkushtimin e Shteteve të Bashkuara për të ndërmarrë të gjitha hapat e mundshëm për të mbrojtur Izraelin dhe theksoi forcimin e pranisë dhe aftësive ushtarake amerikane në të gjithë Lindjen e Mesme në dritën e përshkallëzimit të tensioneve rajonale”, thuhet në deklaratë.
Ushtria amerikane ka njoftuar tashmë se do të vendosë avionë luftarakë dhe anije luftarake të marinës në Lindjen e Mesme, ndërsa Uashingtoni kërkon të forcojë mbrojtjen e Izraelit.
