Një aksident i rëndë është regjistruar ditën e sotme në Pukë ku humbi jetën 34-vjeçari me inicialet G.K.
Mëngjesin e sotëm, familjarët 34-vjeçarit, banues në fshatin Berishë , kanë njoftuar Policinë se kishin humbur kontaktet me të riun që prej mbrëmjes së datës 28 shtator. Ai kishte shkuar në fshatin Iballë ditën e djeshme dhe në mbrëmje kishte njoftuar familjen se po kthehej për në banesë.
Gjatë kontrollit të rrugës paraditen e sotme, në vendin e quajtur “Laku i Qershisë”, në një rrugë dytësore që të çon në lagjen Bullicë të fshatit Berishë Vendi, rreth 50 metra poshtë rrugës është gjetur trupi i pa jetë i të riut.
Dyshohet se 34-vjeçari, duke u kthyer me automjet për në banesë, si pasojë e motit të keq ka humbur kontrollin mbi drejtimin e automjetit dhe ka dalë nga rruga.
Ndërkohë janë publikuar edhe pamjet nga makina e cila është shkatërruar e gjitha dhe shanset për të shpëtuar kanë qenë shumë të pakta .
