Presidenti i Maqedonisë së Veriut, Gjorge Ivanov, ka refuzuar që të dekretojë 11 ligje që janë miratuar me emrin Republika e Maqedonisë së Veriut.
Sipas mediave maqedonase, bëhet fjalë për ligje në sfera të ndryshme në ekonomi, marrëveshje për bashkëpunim mes shteteve, marrëveshje për shërbimet e sigurisë, për shërbime në armatë, ligjin për komunikime elektronike, për qasje të lirë në informacionet e karakterit publik e të tjera.
Në arsyetimin e tij presidenti Ivanov, thekson se ligjet nuk i dekretoi sepse gjatë ushtrimit të funksionit, gjithmonë ka vepruar në bazë të betimit të dhënë se do të mbrojë kushtetutën dhe interesat e Republikës së Maqedonisë.
Kuvendi bëri të ditur se kreu i shtetit nuk i ka dekretuar as ligjet që ishin miratuar me dy të tretat e votave, që kryesisht kanë të bëjë me reformat në gjyqësor, e që konsiderohen si kyçe për procesin e integrimit evropian të Maqedonisë së Veriut.
Ligjet janë miratuar pas 11 janarit, kur edhe ishin miratuar ndryshimet kushtetuese për ndryshimin e emrit të Maqedonisë në Republika e Maqedonisë së Veriut.
Ivanov e ka kundërshtuar Marrëveshjen për Emrin me Greqinë, të arritur më 17 qershor, 2018, duke thënë se ajo nuk është në interesa të shtetit.
