Arrestimi në Teheran i gazetares italiane Cecilia Sala ka shkaktuar shqetësim të madh. Njëzet e nëntë vjeçe, Sala bashkëpunon me gazetën Il Foglio, me kanalin televiziv privat La 7 dhe relizon një podcast për çështje të politikës ndërkombëtare dhe aktualitetit.
Ajo u arrestua më 19 dhjetor, teksa po përgatitej të kthehej në Itali, pas dy javësh në kryeqytetin iranian. Ai u përpoq të theksonte aspekte të padukshme të përditshmërisë së qytetarëve, me detaje të interesit gazetaresk.
Burgjet e terrorit
Deri më sot, asnjë akuzë zyrtare nuk është ngritur kundër saj. Ajo që dihet se është në burgjet e Evinit, së bashku me të burgosurit politikë, në kushte çnjerëzore. Dritat nuk fiken kurrë, çdo qeli është e mbushur me shtatë ose më shumë të burgosur dhe ka britma të vazhdueshme torture. Gazetarja italiane u lejua vetëm të fliste në telefon për disa sekonda me nënën e saj dhe të takonte ambasadoren italiane në Teheran.
Hakmarrje nga Teherani?
“Ne po e ndjekim të gjithë rastin që në momentin e parë. Ne po punojmë për lirimin e Cecilias, duhet kujdes dhe fshehtësi”, tha ministri i Jashtëm italian Antonio Tajani. Sipas shtypit, ka mundësi të jetë një hakmarrje nga Teherani, për shkak të arrestimit, dy javë më parë, në aeroportin e Milanos, të iranianit Mohammad Abedini Nazafabadi. Ai sapo kishte mbërritur në kryeqytetin italian nga Stambolli dhe akuzohet për trafik armësh. Urdhri për arrestimin e tij është lëshuar nga Shtetet e Bashkuara.
Por gjithashtu, aludohet se Teherani është zemëruar me gazetaren italiane dhe nga një vlerësim i saj ndaj aktores vendase Zeinab Moussai. Kjo e fundit u arrestua për disa shfaqje me humor ironik ndaj regjimit, gjë që e çoi pas hekurave. Më 18 dhjetor, në rrjete italiania shkroi: “Zeinab ka mbledhur një sërë shakash zbavitëse për jetën e të burgosurve. Ditët që kaloi në izolim arriti t’i kthejë në të qeshura”. Tani, në qeli është vetë gazetarja italiane.
