Gjykata e Lartë vendosi të premten që ndalimi i TikTok-ut në vend mund të hyjë në fuqi këtë fundjavë, duke refuzuar apelimin nga pronarët e aplikacionit të njohur, të cilët pretenduan se ndalimi shkelte Amendamentin e Parë.
SHBA – Gjykata e Lartë e SHBA ka vendosur që ndalimi i TikTok-ut të hyjë në fuqi këtë fundjavë, duke refuzuar një apel nga pronarët e aplikacionit, të cilët argumentuan se ndalimi shkel të drejtën për lirinë e shprehjes të mbrojtur nga Amendamenti i Parë.
Kjo masë erdhi pas paralajmërimeve të administratës Biden, e cila e cilësoi aplikacionin si një “kërcënim serioz” për sigurinë kombëtare për shkak të lidhjeve të tij me Kinën. Megjithatë, mbetet e paqartë se si ndalimi do të zbatohet në praktikë, pasi nuk ka precedent për bllokimin e një platforme të madhe të mediave sociale nga qeveria amerikane. Po ashtu, mënyra se si do të zbatohet ndalimi ende nuk është e qartë.
Në opinionin e saj, Gjykata e Lartë pranoi se TikTok përfaqëson një platformë “të veçantë dhe të gjerë për shprehje, angazhim dhe komunitet” për 170 milionë amerikanë.
Por Gjykata vuri në dukje se Kongresi ishte fokusuar te shqetësimet e sigurisë kombëtare, të cilat u bënë faktori kryesor në vendimin për këtë rast.
“Kongresi ka vendosur se shitja e TikTok-ut është e nevojshme për të adresuar shqetësimet e bazuara për sigurinë kombëtare në lidhje me praktikat e mbledhjes së të dhënave të TikTok-ut dhe marrëdhëniet e tij me një kundërshtar të huaj,” shkruhet në opinionin e Gjykatës.
Vëmendja te Trump
Vendimi gjithashtu zhvendos vëmendjen te Presidenti i zgjedhur Donald Trump.
Në prag të hyrjes në fuqi të ndalimit, administrata Biden sinjalizoi se do ta linte zbatimin e tij në dorë të Trump-it, i cili do të inaugurohet të hënën. Pavarësisht kësaj, TikTok ka deklaruar se mund të “mbyllet” kur ndalimi të hyjë në fuqi.
Një zyrtar i administratës Biden tha për CNN të enjten se presidenti në largim planifikon t’ia lërë Trump-it zbatimin e ndalimit.
“Pozicioni ynë për këtë çështje ka qenë i qartë: TikTok duhet të vazhdojë të operojë nën pronësi amerikane,” tha zyrtari. “Duke marrë parasysh kohën kur ndalimi hyn në fuqi gjatë një fundjave festive, një ditë para inaugurimit, do t’i takojë administratës së ardhshme që ta zbatojë.”
Drejtori ekzekutiv i TikTok-ut, Shou Chew, pritet të jetë i ulur përkrah CEO-ve të tjerë të mëdhenj të teknologjisë gjatë ceremonisë së inaugurimit të Trump-it – një shenjë që tregon se presidenti i ardhshëm mund të shpëtojë aplikacionin nga mbyllja.
Ndërkohë, disa anëtarë të Kongresit kanë sugjeruar që TikTok mund të ketë nevojë për më shumë kohë për të gjetur një blerës, gjë që mund ta shtyjë Trump-in të kërkojë shtyrjen e ndalimit.
Ligji i jep presidentit mundësinë ta zgjasë ndalimin me 90 ditë, por për ta bërë këtë, duhet të ketë prova se palët që punojnë për blerjen kanë bërë përparime të rëndësishme, përfshirë marrëveshje ligjore të detyrueshme për një marrëveshje të tillë. Megjithatë, kompania mëmë e TikTok-ut, ByteDance, nuk ka përditësuar publikisht qëndrimin e saj se aplikacioni nuk është në shitje.