Në planet vendore të bashkisë së miratuar nga Erion Veliaj u shpik një rrugë, ndërtimi i së cilës rriste vlerën e pronës së zotëruar nga familja Xoxa, ndërsa projektin e ndërtimit të pallatit e hartoi miku i saj, Alban Eftimiu.
Gjykata e Tiranës shpalli si të paligjshëm ndërtimin e një rruge, të miratuar nga Bashkia e Tiranës, e cila i hapte shtigje zhvillimit të një prone të poseduar fillimisht nga Ajola Xoxe dhe më pas nga të afërmit të saj, në qendër të Tiranës.
Pas hetimit gjyqësor rezultoi se Plani përmbante fakte të falsifikuara, pasi rruga “Hajdar Kërçiku” nuk ekzistonte në terren dhe nuk ishte parashikuar në Planin e Përgjithshëm Vendor. Gjithashtu, procesi i miratimit të PDV-së është zhvilluar pa respektuar procedurat e konsultimit publik me banorët e zonës, siç kërkohet nga ligji.
Pas një beteje të gjatë ligjore, gjykata ka vendosur që Plani i Detajuar Vendor (PDV) i miratuar nga Bashkia Tiranë, i cili parashikonte ndërtimin e kësaj rruge, është i pavlefshëm.
Për më tepër, u provua se vendimi për ndërtimin e rrugës është marrë në kushtet e konfliktit të interesit, duke marrë parasysh lidhjet familjare të Kryetarit të Bashkisë me pronat ishte vetëm zhvillimi i rrugës së re ua rrit vlerën disafish.
Gjatë gjykimit, Qendra “Res Publica” e cila përfaqësonte në këtë proces një prej familjeve që u prekën nga planet vendore të Bashkisë, provoi se Kryetari i Bashkisë Erion Veliaj ka tejkaluar kompetencat e tij, pasi miratimi i ndërtimit të rrugëve të reja bie nën juridiksionin e Këshillit Kombëtar të Territorit dhe jo të Bashkisë.