Moderatorja dhe gazetarja e njohur e emisionit qendror “Open”, në News24, Eni Vasili është zgjedhur drejtoreshë e Përgjithshme e Radio Televizionit Publik Shqiptar.
Drejtuesja e Open, Eni Vasili u zgjodh sot në votimin e dytë të Këshillit Drejtues të RTSH-së. Ajo arriti të marrë 7 votat e nevojshme për të drejtuar Televizionin Publik. Dy kandidatët e tjerë, Xhoi Jakaj mori 3 vota dhe Engjëll Musai 1 votë.
Mandati i drejtuesit të drejtorit të RTSH është 5-vjeçar. Votimi i parë për të zgjedhur drejtorin e Përgjithshëm të RTSH-së u mbajt dje, por asnjë nga kandidatët nuk arriti të marrë votat e nevojshme për t’u zgjedhur drejtues i RTSH-së.
Sot, e premte, votimi i dytë u mbajt mes tre kandidatëve më të votuar nga dje, Eni Vasili, Xhoi Jakaj dhe Engjëll Musai.
Eni Vasili rezultoi më e votuara duke marrë 3/5 e votave të nevojshme për t’u zgjedhur Drejtor i Përgjithshëm.
“Votimi i dytë për Drejtor të Përgjithshëm të Radio Televizionit Shqiptar rezulton të jetë i suksesshëm, pasi arrin të realizojë nevojën statutore të Radio Televizonit Publik Shqiptar për zgjedhjen e Drejtorit të Përgjithshëm prej 3/5 të anëtarëve të Këshillit Drejtues. Kandidatja Eni Vasili zgjidhet Drejtor i Përgjithshëm i Radio Televizionit Publik Shqiptar me 7 vota. Suksese zonja Vasili!” u shpreh kryetari i Këshillit Drejtues, Fatjon Hoxhalli.
Votimi i sotëm, e premte
Eni Vasili 7 vota
Xhoi Jakaj 3 vota
Engjëll Musai 1 Votë
Votimi ditën e enjte
Emrat dhe votat:
Eni Vasili 5 Vota
Xhoi Jakaj 2 Vota
Engjëll Musai 2 Vota
Ermal Hoxha 1 Votë
Flamur Buçpapaj 1 Votë
