Presidenti i Republikës, Bajram Begaj, priti sot me një ceremoni solemne Madhërinë e Tij, Abdullah II bin Al Hussein, Mbret i Mbretërisë Hashemite të Jordanisë, si dhe delegacionin zyrtar që e shoqëronte.
Rritja e dialogut politik dhe zgjerimi i marrëdhënieve ekonomike, nxitja e investimeve dhe shkëmbimeve tregtare, vijimi i bashkëpunimit shumëpalësh në nivel ndërkombëtar, mbështetja e Kosovës në arenën ndërkombëtare, qëndrimi i palëkundur i Shqipërisë në dënimin e çdo forme dhune e terrori, si dhe mbështetja e zgjidhjes së situatës në Lindjen e Mesme me dy shtete ishin në fokus të takimit mes Kreut të Shtetit dhe Mbretit të Jordanisë.
Fillimisht, Kreu i Shtetit zhvilloi takim tête-à-tête me Mbretin Abdullah II dhe më pas liderëve të dy shteteve iu bashkuan delegacionet përkatëse në një takim të veçantë.
Presidenti i Republikës, Bajram Begaj, vlerësoi marrëdhëniet shumë të mira dhe miqësore Shqipëri-Jordani, të cilat mbështeten mbi bazat e respektimit të parimeve të sovranitetit, interesit të ndërsjellë, zgjerimit të marrëdhënieve dy dhe shumëpalëshe. Në takim u shpreh vullneti i përbashkët për ta thelluar më tej këtë bashkëpunim përmes forcimit të dialogut politik, shkëmbimit të vizitave, si dhe nëpërmjet plotësimit të kuadrit institucional të bashkëpunimit.
Presidenti Begaj theksoi rëndësinë e thellimit të bashkëpunimit ekonomik në fushat e turizmit dhe kulturës, të rritjes së shkëmbimeve tregtare, të investimeve jordaneze në Shqipëri dhe shtimin e numrit të turistëve. Për këtë, Presidenti i Republikës u shpreh se shteti shqiptar është i gatshëm të plotësojë kornizën e plotë ligjore që lehtëson bashkëpunimin.
Pjesë e rëndësishme e takimeve ishin zhvillimet në rajonin e Ballkanit.
Kreu i Shtetit i kërkoi Madhërisë së Tij, Abdullah II bin Al Hussein, mbështetjen e Jordanisë ndaj Kosovës për njohje të reja dhe anëtarësimin e saj në organizatat ndërkombëtare. Presidenti Begaj theksoi se Shqipëria dhe faktori shqiptar në rajon ka bërë dhe bën përpjekje të vazhdueshme për stabilitetin dhe sigurinë në Ballkanin Perëndimor, pasi e konsideron këtë si të vetmen rrugë për një të ardhme Euroatlantike dhe në të mirë të qytetarëve të këtij rajoni.
Si gjatë takimit tête-à-tête, dhe në tryezën e diskutimeve me praninë e delegacioneve, palët u angazhuan për bashkëpunim në organizatat ndërkombëtare, ndërsa shkëmbyen opinione për sfidat dhe perspektivat e agjendës globale.
Presidenti i Republikës, Bajram Begaj, theksoi gjatë takimit se Shqipëria vlerëson rolin kyç të Mbretërisë Hashemite të Jordanisë për paqen dhe stabilitetin në rajonin e Lindjes së Mesme. Në veçanti, Kreu i Shtetit çmoi përpjekjet e Mbretit Abdullah II në promovimin e ekuilibrave dhe bashkëpunimit ndërkombëtar për çështje të sigurisë.
Kreu i Shtetit rikonfirmoi qëndrimin e Shqipërisë, që është i njëjtë me atë të Jordanisë, se e vetmja rrugë për një zgjidhje të drejtë, të qëndrueshme dhe gjithëpërfshirëse të konfliktit në Lindjen e Mesme është zgjidhja me dy shtete.
Presidenti i Republikës vlerësoi rolin drejtues të Jordanisë dhe Madhërisë së Tij, Mbretit Adbdullah II, në iniciativën e Procesit të Aqaba-s, si një nismë e suksesshme dhe me rezultate konkrete në luftën kundër terrorizmit dhe ekstremizmit të dhunshëm. Gjithashtu, Kreu i Shtetit u shpreh se, si një vend anëtar i NATO-s, Shqipëria ka mbështetur hapjen e zyrës ndërlidhëse të NATO-s në Jordani dhe e vlerëson maksimalisht Jordaninë si vend partner i rëndësishëm në krahun jugor të NATO-s.
Në fund të takimit, Presidenti Begaj theksoi se, përballë sfidave të sigurisë, Jordania mbetet një kolonë e fortë stabiliteti dhe ne jemi të përkushtuar të forcojmë bashkëpunimin dypalësh në të gjitha fushat, përfshirë mbrojtjen dhe sigurinë, duke adresuar sfidat e përbashkëta dhe forcuar vlerat që na bashkojnë.
Mbreti i Mbretërisë Hashemite të Jordanisë, Madhëria e Tij, Abdullah II bin Al Hussein, bashkë me delegacionin që e shoqëroi, e zhvilluan këtë vizitë zyrtare në Shqipëri me ftesë të Presidentit të Republikës së Shqipërisë, Shkëlqesisë së Tij, Zotit Bajram Begaj.
