Berat, 10 Maj 2025 – Në kuadër të përmbushjes së detyrave institucionale që lidhen me procesin zgjedhor,
Drejtoria Vendore e Policisë Berat ka angazhuar me përkushtim strukturat e saj për të garantuar sigurinë në çdo fazë të zhvillimit të votimeve.
👮♂️ 293 punonjës policie në terren
Për ruajtjen e 6 Komisioneve Zonale të Administrimit Zgjedhor (KZAZ) dhe 275 Qendrave të Votimit në qarkun Berat, janë angazhuar gjithsej 293 efektivë policie.
📦 Materialet zgjedhore – në ruajtje të sigurtë
Pas përfundimit të shpërndarjes së materialeve zgjedhore në të gjitha qendrat e votimit, punonjësit e Policisë janë paraqitur në vendngjarje në orën 18:00 të ditës së sotme dhe kanë marrë në ruajtje objektet zgjedhore. Ruajtja do të vazhdojë deri në mëngjesin e nesërm, kur do të nisin punën Komisionet e Qendrave të Votimit dhe KZAZ-të.
📋 Zbatim i përpiktë i planit të masave
Të gjitha detyrat e parashikuara në planin e hartuar nga Policia e Beratit janë zbatuar në përputhje me procedurat standarde dhe me përpikëri të plotë.
🖥️ Monitorim në kohë reale
Në Drejtorinë Vendore të Policisë Berat funksionon një grup drejtues, i cili monitoron situatën në kohë reale, ndjek zbatimin e detyrave operacionale dhe menaxhon informacionin për të garantuar një komunikim të shpejtë me median dhe qytetarët.
🟢 Situata aktuale: e qetë dhe pa incidente
Deri në këto momente, situata e rendit dhe sigurisë publike në qarkun Berat paraqitet e qetë dhe pa probleme.
🚨 Gatishmëri e plotë për një proces zgjedhor të sigurt
Policia e Beratit mbetet në gatishmëri të lartë për të siguruar një proces zgjedhor të qetë, të rregullt dhe në përputhje me ligjin.
