Ekzistojnë shumë mite rreth proteinave, por një gjë është e qartë: trupi ynë ka nevojë për to për të funksionuar siç duhet – dhe shumë prej nesh nuk po marrin mjaftueshëm.
Proteina është një nga tre makronutrientët kryesorë, përkrah karbohidrateve dhe yndyrave, dhe një konsum i rregullt ndihmon që të ndiheni të ngopur dhe me energji.
Çfarë janë proteinat?
Proteinat përbëhen nga aminoacide – të cilat dietologia e regjistruar Cara Harbstreet i quan “blloqet ndërtuese të jetës.”
Sipas Institutit Kombëtar të Shëndetit në SHBA, ato janë molekula të mëdha dhe komplekse që kryejnë funksione të shumta në trup: ndihmojnë në strukturën dhe funksionimin e qelizave, si dhe në rregullimin e indeve dhe organeve.
Shenja që tregon mungesë proteinash në organizëm
Nëse ndiheni vazhdimisht të lodhur, të uritur ndërmjet vakteve, ose keni vështirësi për t’u rikuperuar pas stërvitjes apo një sëmundjeje, trupi juaj mund të jetë duke sinjalizuar mungesë proteinash.
Sipas dietologes Lauren Harris-Pincus, autore e The Protein-Packed Breakfast Club, marrja e mjaftueshme e proteinave ju ndihmon të ndiheni të ngopur pas vakteve dhe i jep trupit kapacitetin për t’u rikuperuar më shpejt.
Sa proteina duhet të konsumoni?
Kjo ndryshon nga personi në person – varet nga mosha, gjinia, pesha trupore, stili i jetesës dhe niveli i aktivitetit fizik.
Harbstreet shpjegon se një vakt i shëndetshëm duhet të përmbajë 10–15 gramë proteina, ndërsa vaktet kryesore mund të përmbajnë mbi 30 gramë.
Këshilla më e mirë është të konsultoheni me një dietolog të regjistruar për të përcaktuar sasinë më të përshtatshme për ju.
Për të ndërtuar një vakt të ekuilibruar, Harris-Pincus sugjeron ndarjen e pjatës kështu:
- ¼ me proteina të shëndetshme
- ¼ me drithëra të plota
- ½ me fruta dhe perime të freskëta
Si të shtoni më shumë proteina në dietën tuaj?
Fatmirësisht, ekzistojnë shumë receta të shijshme dhe ushqyese që ju ndihmojnë të përmbushni nevojat ditore për proteina.
Nisni me mëngjesin – që sipas ekspertëve është vakti ku shumica e njerëzve marrin më pak proteina. Ja disa ide nga Harris-Pincus për të pasur një mëngjes të pasur me proteina:
- Pure me djathë të bardhë (cottage cheese), fruta të freskëta dhe fistikë
- Tërshërë me qumësht, kos grek, fara chia, fruta dhe arra
- Vezë të fërguara të kombinuara me djathë të bardhë për më shumë proteina/ Shendeti.com.al / Burimi: Prevention.com
