Një punonjës ka mbetur i lënduar rëndë në Uzinën e Ferrokromit pasi një pllakë me peshë prej qindra kg i ka rënë mbi trup.
Rudin Mecja raportohet se ndodhej në turnin e parë kur i ra sipër pllaka e rëndë.
Mjekët kanë konstatuar se punonjës, mekanik në Uzinën e Ferrokromit, ka pësuar dëmtime.
Për shkak të gjendjes kritike është transportuar për në Spitalin e Traumës në Tiranë.
Ngjarja e rëndë ndodhi vetëm një muaj pas një vendimi ndaj kompanisë Albcrom, e cila në muajin Maj është gjobitur me 8 milionë lekë nga autoritetet për shkelje të rënda të standardeve të sigurisë teknike në procesin e punës.
Sipas raportimeve, kompania nuk kishte garantuar mbrojtjen dhe masat e nevojshme për mbrojtjen e jetës si edhe shëndetit të punonjësve.
Pas aksidentit të sotëm, Inspektorati Shtetëror i Punës dhe Shërbimeve Shoqërore ka vendosur pezullimin e menjëhershëm të aktivitetit të uzinës Albcrom në pritje të hetimeve të plota dhe verifikimeve në terren mbi shkaqet dhe përgjegjësitë që çuan në këtë ngjarje të rëndë.
