Teksa dhe vetë ish-presidenti Clinton, çlirues i Kosovës, po del kundër asaj çfarë bën Izraeli, posaçërisht Netanyahu, duke e tërhequr Amerikën në një luftë të paprinciptë, personazhe kontraverse të opinionit kosovar, siç Halil Matoshi, sulmojnë plot mllef çdokënd që është kundër sulmit ndaj Iranit, duke e kategorizuar fët e fët, me lehtësi djallëzore, si anti-amerikan.
Shënjestër e tij janë sidomos muslimanët e posaçërisht hoxhallarët, të cilët jo domosdoshmërisht janë pro-iranianë, madje fare të tillë, por janë kundër një lufte e cila në thelbin e vet e padrejtë, e pabesë dhe që e zhyt Lindjen e Mesme edhe më në kaos e krizë, me viktimë popujt muslimanë, veçanërisht Palestinën, pa asnjë tregues se tentohet paqja apo drejtësia në ato toka të lara me gjak prej tragjedive njerëzore të shkaktuara nga Izraeli, nxitës i çdo lufte.
Ndaj, një ndër hoxhallarët e njohur të Prishtinës, Hysamedin Abazi, e ka parë me vend që të reagojë ndaj kinse analist Halil Matoshit, një figure që nuk ngjal kurfarë simpatie në publikun kosovar, i njohur më së shumti për gjuhën e tij katastrofike, më shumë zhurmëbërëse se sa të mençur e me etikë.
Gjithashtu, hoxha në fjalë sheh te mllefi i Matoshit dhe një aspekt për t’u trajtuar nga drejtësia.
Shkruan Hysamedin Abazi:
“Jo Halil, hoxhallarët nuk bëhen servila si ju
Pas agresionit të mbrëmshëm amerikan ndaj Iranit, gazetari Halil Matoshi sot i paska thurur elozhe këtij agresioni siç kanë bërë edhe disa kolegë të tij gazetarë dhe disa politikanë, një gjë që nuk e kanë bërë shumë gazetarë dhe politikanë amerikan. Madje Senatori Barnie Sanders sot para një numri të madh të përkrahësve të tij jo vetëm që nuk e përkrahu këtë agresion antikushtetues, por dhe ishte shumë i ashpër kundër presidentit Trump dhe i kujtoi që një vendim për luftë dhe agresion ndaj një shteti tjetër mund ta marr vetëm Kongresi Amerikan e kurrsesi presidenti njëanshëm siç bëri Trumpi në këtë rast. Gjithashtu shihet qartë se
sot në përgjithësi populli liridashës dhe paqësorë amerikan po e shpreh kundërshtimin e tij ndaj këtij akti armiqësorë ndaj një shteti të pavarur dhe sovran, i cili në asnjë mënyrë nuk i shërben interesave të popullit dhe shtetit amerikan (pushtetit ndoshta)?!
Pos tjerash, z. Matoshit i paska penguar edhe qëndrimi parimor dhe antidhunë i hoxhallarëve që janë shprehur kundër këtij agresioni dhe kundër vrasjes së fëmijëve dhe të civilëve të pafajshëm në Gaza. Madje siç di ai me gjuhën e tij fshatareske (se kemi fjalën këtu për gegnishtën tonë të ëmbël) jo vetëm që i fyen hoxhallarët, por edhe thërret në likuidimin e tyre (po e përsëris, likuidimin e tyre) duke shkruar:” Pos tradhti dhe injorancë e skajshme?!
‘Asht humane sëkëndejmi, qe kjo teokraci imamësh me u dërmu e rrekny n’humnerë e kush âsht me Ajatollahët dmth. âsht me kast anmik i lirisë!’
Pa dashur ta zgjas, po ta them edhe një herë z. Matoshi:
Jam kundër agresionit amerikan ndaj shtetit të pavarur e sovran të Iranit, por nuk jam me Ajatollahët e tu!
Jam kundër agresionit izraelit ndaj Iranit.
Jam kundër agresionit rus ndaj shtetit të pavarur dhe sovran të Ukrainës.
Jam kundër terrorizmit dhe gjenocidit të paparë izraelit ndaj popullit palestinez dhe në veçanti Gazës.
Jam kundër çdo terrori, gjenocidi, dhune dhe mosdurimi racor, fetar dhe qytetërimor, kudo që ndodhin ato.
Jam kundër çdo lloj servilizmi dhe shkeljeje të Parimeve të Njerzillakut, edhe atëherë kur ju dhe disa politikanë na ftoni në të kundërtën!
Krejt në fund do thoja se këtu ka vend edhe për denoncimin e z. Matoshit për thirrje në dhunë dhe mosdurim fetar. Tjerat po ua lë juve t’i komentoni…”.
