Fotot e bëra të premten tregojnë ekskavatorë dhe buldozerë të rëndë që lëvizin nëpër objektin e Fordow.
Imazhet e reja satelitore tregojnë aktivitet pastrimi në kompleksin bërthamor të bombarduar Fordow të Iranit, disa ditë pas sulmeve masive ajrore amerikane dhe izraelite që synonin dëmtimin e programit bërthamor të Teheranit. Imazhet, të marra nga Business Insider, u morën të premten dhe tregojnë ekskavatorë dhe buldozerë të rëndë që lëvizin tokën pranë kratereve dhe gropave në rajonin malor verior të Fordow, sipas firmës amerikane të imazheve satelitore Maxar Technologies.
Zona u godit nga bombat depërtuese amerikane GBU-57, të cilat Pentagoni thotë se kishin në shënjestër kanalet e ventilimit thellë në kompleksin nëntokësor.
Imazhe të tjera tregojnë makineri që pastrojnë rrugë të reja hyrëse (thuhet se Izraeli i goditi ato një ditë pas bombardimeve amerikane) dhe riparojnë rrugën kryesore që të çon në qendrën nëntokësore të pasurimit. Sipas ekspertëve në Institutin Mbretëror të Shërbimeve të Bashkuara (RUSI), iranianët mund të jenë duke u përpjekur të rivendosin aksesin për të vlerësuar shkallën e dëmit dhe gjendjen e pajisjeve, megjithëse kjo nuk është konfirmuar zyrtarisht.
Gjenerali Dan Kaine, kryetar i Shtabit të Përbashkët të SHBA-së, tha në një konferencë për shtyp në Pentagon se “Operacioni “Heakri i Mesnatës” përfshinte bomba “shkatërruese bunkerësh” që binin njëra pas tjetrës në boshtet e ventilimit, rezultat i një studimi 15-vjeçar nga Agjencia Amerikane e Reduktimit të Kërcënimit Bërthamor (DTRA) mbi mënyrën se si ato mund të shkatërronin kompleksin nëntokësor.
Donald Trump është mburrur se sulmet amerikane kanë shkaktuar “shkatërrimin total” të infrastrukturës bërthamore të Iranit dhe ka vlerësuar se Teherani nuk do të jetë në gjendje ta rindërtojë atë. Megjithatë, ekspertët e armëve bërthamore vënë në dyshim nëse programi është neutralizuar plotësisht. Siç vërejnë ata, është e vështirë të “bombardohet njohuria” dhe Teherani tani mund të ketë një nxitje edhe më të madhe për të ecur përpara me zhvillimin e armëve bërthamore.
Bombardimet e fundjavës së kaluar goditën gjithsej tre vende kryesore: Fordow dhe Natanz me bomba me depërtim të thellë dhe Isfahan me raketa Tomahawk të lëshuara nga deti. Shkalla e dëmit në rezervat dhe pajisjet e uraniumit të pasuruar është ende duke u vlerësuar.