Mbretëria e Bashkuar, Franca dhe Gjermania kanë lëshuar një deklaratë ku thonë se “katastrofa humanitare në Gaza duhet të marrë fund menjëherë”. Ata i kanë bërë thirrje Izraelit që të “heqë menjëherë kufizimet në rrjedhën e ndihmave”.
“Katastrofa humanitare që po dëshmojmë në Gaza duhet të marrë fund tani”, thuhet në një deklaratë të përbashkët. “Ndalimi i ndihmës thelbësore humanitare për popullsinë civile është i papranueshëm”.
Deklarata e përbashkët gjithashtu u bën thirrje të gjitha palëve “të japin fund konfliktit duke arritur një armëpushim të menjëhershëm” dhe i kërkon Hamasit të bjerë dakord për “lirimin pa kushte të të gjithë pengjeve”.
“Nevojat më themelore të popullsisë civile, përfshirë aksesin në ujë dhe ushqim, duhet të përmbushen pa asnjë vonesë të mëtejshme”, vazhdon deklarata.
Deklarata shton: “Çarmatimi i Hamasit është i domosdoshëm dhe Hamasi nuk duhet të ketë asnjë rol në të ardhmen e Gazës”.