Prokuroria e Posaçme Kundër Korrupsionit dhe Krimit të Organizuar ka regjistruar procedimin penal nr. 20, viti 2023, për disa vepra të rënda penale që përfshijnë kontrabandë me mallra me akcizë, shpërdorim detyre dhe veprime në kuadër të një grupi të strukturuar kriminal.
Në kuadër të këtij hetimi, Prokuroria ka kërkuar vendosjen e sekuestros preventive mbi disa pasuri të paluajtshme dhe të luajtshme, kërkesë që është pranuar nga Gjykata e Posaçme e Shkallës së Parë, me vendimin nr. 473, datë 28.07.2025.
Sipas vendimit, është vendosur sekuestrimi i:
-
9 pasurive të paluajtshme në emër të shoqërisë “Albania Tabak Fabrika e Re e Cigareve” sh.p.k.
-
7 apartamenteve banimi në një kompleks modern në Tiranë
-
3 njësive parkimi me depo
-
2 vilave luksoze në zonën e Mulletit, përfshirë një në kompleksin “Rolling Hills”
Vlera totale e pasurive të sekuestruara llogaritet në rreth 9.3 milionë euro, që dyshohet se rrjedh nga aktivitet i paligjshëm kontrabande dhe përfitime kriminale.
Sqarim zyrtar: Çdo person apo subjekt i përfshirë në këtë procedim prezumohet i pafajshëm deri në një vendim përfundimtar të formës së prerë nga gjykata.