Ai ndihmoi në përfundimin e konfliktit të armatosur me Tajlandën që shkaktoi dhjetëra vdekje.
Kamboxhia do të nominojë Presidentin e SHBA-së Donald Trump për Çmimin Nobel për Paqen, tha të premten zëvendëskryeministri kamboxhian Sun Chandol. Kur u pyet nëse e konfirmoi planin e Kamboxhias për ta nominuar Trumpin për çmimin, Chandol u përgjigj “po”. Ai shpjegoi se arsyeja e nominimit ishte ndërhyrja e drejtpërdrejtë e Trumpit që çoi në përfundimin e mosmarrëveshjes së fundit kufitare midis vendit të Azisë Juglindore dhe Tajlandës.
Duke folur me gazetarët, Chandol e falënderoi Trumpin për sjelljen e paqes dhe tha se e meritonte nominimin për çmimin.
Pakistani tha në qershor se do ta nominonte Trumpin për Çmimin Nobel për Paqen për përpjekjet e tij për të zgjidhur konfliktin me Indinë. Kryeministri izraelit Benjamin Netanyahu tha gjithashtu në korrik se e kishte nominuar Trumpin për çmimin.
Një telefonatë nga Trump javën e kaluar theu bllokimin në përpjekjet për t’i dhënë fund luftimeve më të këqija midis Tajlandës dhe Kamboxhias në më shumë se një dekadë, duke çuar në një armëpushim të negociuar në Malajzi të hënën, më 28 korrik.
Pas njoftimit të armëpushimit, zëdhënësja e Shtëpisë së Bardhë, Caroline Leavitt, shkroi në një postim në platformën X se ishte Trumpi që e bëri të mundur. “Jepini atij Çmimin Nobel për Paqen”, shkroi ajo.
Të paktën 43 persona, përfshirë shumë civilë, u vranë në luftimet e ashpra që zgjatën pesë ditë, duke zhvendosur të paktën 300,000 njerëz në të dyja anët e kufirit.
“Ne i njohim përpjekjet e tij të mëdha për paqe”, tha Chandol, i cili gjithashtu kryeson ekipin negociator të tregtisë së Kamboxhias, duke shtuar se vendi i tij ishte mirënjohës ndaj Shteteve të Bashkuara për një ulje të tarifave prej 19%.
Uashingtoni fillimisht kishte kërcënuar me tarifa prej 49%, por më vonë i uli ato në 36%, një nivel që do të kishte shkatërruar sektorin thelbësor të veshjeve dhe këpucëve të Kamboxhias, tha Chandol për Reuters në një intervistë.