Pas ditësh të tëra në përmasa alarmante, zjarri në zonën turistike të Syrit të Kaltër është shuar mbrëmjen e së hënës. Situata ka qenë veçanërisht shqetësuese gjatë gjithë natës në fshatin Pecë, i cili ndodhet shumë pranë zonës së prekur nga flakët.
Shërbimet zjarrfikëse të Finiqit, Delvinës dhe Sarandës, së bashku me banorët e zonës, kanë punuar pa ndërprerje për të mbajtur nën kontroll përhapjen e zjarrit. Terreni i thyer dhe malor ka vështirësuar ndërhyrjen nga toka, ndërsa era e fortë ka ndikuar në përhapjen e shpejtë të flakëve, të cilat arritën deri në rrugën nacionale.
Për të garantuar sigurinë e banorëve, autoritetet kanë ndërmarrë evakuimin e fshatit Pecë. Ndërkohë, mëngjesin e sotëm, dy helikopterë janë angazhuar për të shuar nga ajri vatrat e mbetura.