Nadeen Ayoub ka njoftuar se do të përfaqësojë Palestinën për herë të parë në konkursin e bukurisë Miss Universe të 74-t, i cili do të mbahet këtë nëntor në Pak Kret, Tajlandë.
“Sot ngjitem në skenën e Miss Universe jo vetëm me titullin – por me të vërtetën. Ndërsa Palestina kalon nëpër pikëllim – veçanërisht në Gaza – unë mbaj zërin e një populli që refuzon të heshtë”, shkroi ajo në Instagram.
“Unë përfaqësoj çdo grua dhe fëmijë palestinez, forcën e të cilëve bota ka nevojë ta shohë. Ne jemi më shumë sesa vuajtja jonë – ne jemi qëndrueshmëria, shpresa dhe zemra e atdheut që jeton përmes nesh”, shtoi ajo.
Ayoub, një trajnere fitnesi dhe konsulente e të ushqyerit që tani jeton në Dubai, më parë mbante titullin Miss Earth Water në konkursin e bukurisë Miss Earth 2022 në Manila, raporton Arab News.
Ajo ishte gjithashtu femra e parë që përfaqësoi Palestinën në këtë ngjarje, e cila konsiderohet si një nga katër konkurset kryesore ndërkombëtare të bukurisë, së bashku me Miss World, Miss Universe dhe Miss International.
Ajo u kurorëzua Miss Palestina 2022. Ayoub është themeluesja e Olive Green Academy, një shkollë krijimi përmbajtjeje që integron qëndrueshmërinë me inteligjencën artificiale. /tesheshi.com/
