E RËNDË/ Makina merr përpara turmën e njerëzve pas sherrit në lokal, 1 viktimë dhe 5 të plagosur

Policia ka hapur një hetim për vrasje dhe tentativë vrasjeje

Një i vdekur dhe pesë të plagosur, prej të cilëve dy rëndë. Ky është bilanci i një nate çmendurie në qytetin francez të Evreux.

Pas një sherri në një bar, rreth orës 4 të mëngjesit, një burrë që drejtonte një makinë dyshohet se ka përplasur me qëllim një grup njerëzish jashtë lokalit.

“Një person mori një makinë dhe me qëllim bëri marsh të kundërt me shpejtësi të lartë mes turmës”, deklaroi prokurori i Evreux, Rémi Coutin, për AFP, duke shtuar se tre persona janë arrestuar.

Policia franceze ka hapur një hetim për vrasje dhe tentativë vrasjeje.

“Këtë mëngjes u informova për një aksident të rëndë që ndodhi para lokalit La Winery, në bulevardin Winston Churchill. Ka shpërthyer një sherr që ka shkaktuar lëvizje të turmës dhe një automjet ka përplasur disa persona. Bilanci paraprak është një i vdekur, dy të plagosur në gjendje kritike dhe tre të plagosur më lehtë. Situata tani është kthyer në normalitet. Një hetim është në vazhdim për të përcaktuar rrethanat e sakta të kësaj tragjedie”-, shkruan në Facebook kryetari i bashkisë së Evreux, Guy Lefrand.