Aeroporti Ndërkombëtar i Kopenhagës është mbyllur përkohësisht pasi dronë u panë afër, duke shkaktuar ndërprerje të mëdha në trafikun ajror.
Sipas raportimeve, deri në tre mjete ajrore pa pilot (UAV) hynë në hapësirën ajrore mbi aeroport, duke i detyruar autoritetet të reagojnë menjëherë. Policia është dërguar në vendngjarje dhe po heton në mënyrë aktive incidentin.
“Kemi një prani të madhe në terren,” tha Henrik Stormer, shefi i policisë së Kopenhagës. Mbyllja e aeroportit për ngritje dhe ulje ndodhi rreth orës 8:30 të mbrëmjes sipas kohës lokale, konfirmoi Naviair, kompania përgjegjëse për kontrollin e trafikut ajror.
Policia njoftoi më vonë nëpërmjet rrjeteve sociale X: “Aeroporti është aktualisht i mbyllur për ngritje dhe ulje, pasi dy-tre dronë të mëdhenj u panë duke fluturuar mbi zonë. Afati kohor për rihapjen është ende i panjohur.”
https://x.com/i/status/1970264845087039754
Sipas FlightRadar24, më shumë se 35 fluturime që duhej të uleshin në Kopenhagen deri në orën 22:05 sipas kohës lokale u devijuan në aeroporte të tjera, duke përfshirë Malmö, Billund, Aarhus dhe Göteborg. Origjina e dronëve dhe kush ishte pas incidentit janë ende të panjohura.
Incidenti vjen vetëm disa ditë pasi një sulm i dyshuar kibernetik goditi sistemet e regjistrimit në aeroportet në Londër, Berlin dhe Bruksel. Collins Aerospace, e cila furnizon softuer për regjistrimin e pasagjerëve, ka pësuar një “incident kibernetik” dhe pasojat janë ndjerë në të gjithë Evropën, me shumë fluturime të anuluara dhe të vonuara. /tesheshi.com/