Sipas parashikimeve të fundit nga ekspertët nga Severe Weather Europe, dimri i vitit 2025/2026 mund të sjellë mot dukshëm më të ftohtë në pjesë të Evropës, Shteteve të Bashkuara dhe Kanadasë.
Analizat e sistemeve globale të motit, duke përfshirë fazën oqeanike të La Niña dhe fenomenin stratosferik të Oscilimit Kuazi-Bienal (QBO), tregojnë ngjashmëri me dimrat e kaluar që ishin jashtëzakonisht të ftohtë dhe me dëborë.
La Niña dhe valët e ftohta
Aktivizimi i La Niña-s në Paqësorin tropikal sinjalizon formimin e një faze të ftohtë të oqeanit, e cila në të kaluarën shpesh ka rezultuar në depërtimin e ajrit të ftohtë nga Arktiku drejt gjerësive më të ulëta. Ky fenomen tashmë po prek Amerikën e Veriut, ku priten temperatura më të ftohta dhe reshje më të dendura dëbore, veçanërisht në pjesët veriore dhe qendrore të Shteteve të Bashkuara dhe në pjesën lindore të Kanadasë.
QBO stratosferike dhe vorbulla polare
Në të njëjtën kohë, faza negative e QBO në stratosferë mund të dobësojë vorbullën polare, “rojtaren” kryesore të ajrit të ftohtë arktik. Një vorbull polare më e dobët do të thotë që ajri i ftohtë mund të depërtojë më lehtë në Evropë dhe Amerikën e Veriut, duke rritur rrezikun e valëve më të forta të të ftohtit dhe stuhive të dëborës. Të dhënat historike tregojnë se kombinime të tilla çojnë në periudha të zgjatura dimërore me temperatura të ulëta dhe borë të bollshme.
Evropa dhe valët e ftohta të pritura
Në Evropë, ajri i ftohtë pritet të mbërrijë nga pjesët lindore të kontinentit, ndërsa pjesët perëndimore dhe jugore të Evropës do të përjetojnë kushte të përziera me borë të rastit, veçanërisht në rajonet malore dhe veriore. Reshjet e borës mund të jenë më të dendura në Mbretërinë e Bashkuar, Irlandë dhe vendet skandinave, ndërsa Evropa Qendrore dhe Lindore mund të presin kushte klasike të “dimrit të vjetër” me temperatura më të ulëta dhe reshje të rastit të borës.
Tetori si një muaj kyç
Meteorologët po monitorojnë veçanërisht mbulesën e borës së Siberisë në tetor, pasi mund të dobësojë më tej vorbullën polare dhe të rrisë gjasat e valëve të ftohta në Evropë dhe Amerikën e Veriut. Më shumë borë në tetor paralajmëron dimra më të ashpër dhe rrit shanset që ajri i ftohtë të depërtojë që në fillim të dhjetorit.
Çfarë do të thotë kjo për qytetarët
Edhe pse ende nuk është e mundur të parashikohet çdo ndryshim i motit, ekspertët rekomandojnë që qytetarët të përgatiten për një dimër potencialisht të ftohtë dhe me borë. Kjo përfshin përgatitjen e shtëpive dhe automjeteve, planifikimin e ngrohjes dhe monitorimin e parashikimeve të motit. Dashamirësit e dimrit, nga ana tjetër, mund të presin me padurim kthimin e kushteve “të vjetra, klasike” të dimrit me borë dhe temperatura të ulëta, shkruan Severe Weather Europe. /tesheshi.com/
