E veja e një shtetasi italian që vdiq në mars 2020 nga koronavirusi do të duhet t’i paguajë 200,000 euro një kompanie sigurimi.
Gjykata e shkallës së parë në qytetin e Parmës fillimisht kishte vendosur se familja e të ndjerit kishte të drejtë të merrte shumën specifike nga kompania e sigurimeve. Megjithatë, tani, Gjykata e Apelit e ka rrëzuar vendimin dhe e ka urdhëruar të venë të kthejë paratë që i ishin paguar.
Arsyetimi është se burri i saj kishte nënshkruar një polisë sigurimi që mbulonte “vdekjen për shkak të incidenteve dhe aksidenteve të dhunshme”, por që edhe nëse shkaktonte komplikacione shumë serioze – siç është vdekja – virusi COVID-19 nuk duhet të konsiderohet një incident i dhunshëm. Interpretimi përkatës u konfirmua gjithashtu, me vendimin e saj të fundit, nga Gjykata Supreme e Italisë.
Megjithatë, kishte gjykata në vend që ndoqën një linjë të ndryshme. Një gjyqtar në qytetin e Vercellit, në rajonin verior të Piemontes, vendosi që vdekja e një mjeku – për shkak të COVID-19 – duhet të kompensohet nga kompania e sigurimeve që mbulonte vetëm incidentet dhe aksidentet e dhunshme.
Komentuesit theksojnë se vendimi i gjykatës ndonjëherë ndryshon bazuar në profesionin e viktimës, vendndodhjen ku ndodhi infektimi dhe sigurisht, disa nga kushtet dhe afatet e kontratës së sigurimit që u nënshkrua. /tesheshi.com/
