Trafik në aksin Durrës-Tiranë dhe radhë të gjata mjetesh, duke penguar qarkullimin për shkak të bllokimit të autostradës.
Bllokimi i segmentit të autostradës Vorë-Maminas pasditen e sotme ka bërë që në aksin dytësor të krijohet trafik kilometrik.
Konkretisht, nga kryqëzimi i Budullës (afër Fushë-Krujës), e deri në Maminas.
Drejtuesit e kanë pasur të pamundur të qarkullonin, duke krijuar vështirësi edhe për akset e tjera ndërlidhëse të zonave rurale.
Vargu i mjeteve ka qenë i pandërprerë për rreth 15 kilometra.
Policia pothuajse ka dalë jashtë funksionit, pasi nuk e ka menaxhuar dot këtë fluks mjetesh, sepse arteria kryesore e autostradës ishte e bllokuar.
Për të menaxhuar situatën, shërbimet e Policisë Rrugore dhe Patrullat e Përgjithshme janë vendosur në të gjitha pikat kritike.
Në një deklaratë për mediat, Policia e Tiranës i ka bërë apel drejtuesve të automjeteve që:
“Të tregojnë durim dhe vetëpërmbajtje gjatë kohës së pikut, të respektojnë sinjalistikën rrugore dhe udhëzimet e policisë dhe të përdorin rrugët alternative, nëse është e mundur, për të shmangur vonesa të gjata në lëvizje”.