Të paktën 90 persona, përfshirë 65 fëmijë, besohet se janë infektuar me virusin HIV nga një mjek që përdori një shiringë të kontaminuar. Ngjarja ka shqetësuar banorët e Pakistanit, raporton AFP, duke cituar zyrtarët shëndetësor.
“Pas marrjes së disa ankesave nga autoritetet, kemi arrestuar një mjek”, tha Kamran Navaz, shefi i policisë lokale që drejton rastin.
“Kemi kuptuar se mjeku gjithashtu ka virusin HIV”, shtoi ai.
Autoritetet u njoftuan për ngjarjen javën e kaluar, pasi 18 fëmijë nga një qytet periferik u testuan si “pozitiv” me virusin që shkakton AIDS.
Ata thanë se duke gjurmuar shkakun, arritën tek një mjek i vetëm, i cili duket se ka përdorur një shiringë të kontaminuar tek të gjithë pacientët.
Azra Pechuho, ministre e Shëndetësisë e provincës Sindh, konfirmoi arrestimin e tij.
“Gjaku i prindërve të fëmijëve të infektuar u testua, por rezultatet e tyre ishin negative,” shtoi Pechuho.
Pakistani konsiderohet si një vend me prevalencë të ulët të HIV-it, por sëmundja po zgjerohet kryesisht në mesin e përdoruesve intravenozë të drogës.