Putini e kërcënon Ukrainën me një “përgjigje dërrmuese” nëse ajo përdor armë me rreze të gjatë veprimi kundër objektivave në Rusi.
Vladimir Putin ironikisht zgjodhi të mbante një qëndrim ndaj paketës së 19-të të re të sanksioneve të Bashkimit Evropian kundër Rusisë për shkak të luftës së vazhdueshme në Ukrainë. Pasi fillimisht e quajti këtë zhvillim një “akt armiqësor” që nuk do të ketë ndikim në ekonominë ruse, ai më pas u përqendrua në faktin se paketa e sanksioneve përfshin një ndalim të furnizimit të Rusisë me tualete, lavamanë dhe pajisje të tjera hidraulike.
“Kjo do t’u kushtojë shtrenjtë. Më duket se [tualetet] do t’u nevojiten atyre (evropianëve) duke pasur parasysh situatën në të cilën ndodhen dhe nëse vazhdojnë me këtë politikë ndaj Federatës Ruse”, deklaroi presidenti rus.
Më pas, duke komentuar deklaratat e bëra nga Volodymyr Zelensky në Bruksel në lidhje me mundësinë e Ukrainës për të blerë raketa Tomahawk, Putin e përshkroi atë si një përpjekje për “përshkallëzim serioz” që nuk do të mbetet pa përgjigje.
“Kjo është një përpjekje për përshkallëzim. Por nëse armë të tilla do të përdoren për të goditur territorin rus, reagimi do të ishte shumë serioz, nëse jo dërrmues. Le të mendojnë për këtë”, tha presidenti rus.
Putini mbështeti gjithashtu vazhdimin e “dialogut” pasi homologu i tij amerikan Donald Trump njoftoi shtyrjen e takimit të tyre të planifikuar në Budapest. “Dialogu është gjithmonë i preferueshëm ndaj konfrontimit, mosmarrëveshjeve dhe mbi të gjitha luftës”, tha Putin.