Sipas autoriteteve, tre astronautë kinezë, të bllokuar për ditë të tëra në stacionin hapësinor Tiangong për shkak të dëmtimit të mjetit të tyre të rikthimit në atmosferë, u kthyen në Tokë shëndoshë e mirë të premten, më 14 nëntor, në bordin e një mjeti tjetër.
Udhëtimi i kthimit ishte planifikuar fillimisht për 5 nëntor, në fund të një misioni gjashtëmujor në stacionin hapësinor kinez. U shty pasi u zbuluan çarje në anijen kozmike Shenzhou-20, të ankoruar në stacion, për shkak të një përplasjeje me mbeturinat hapësinore.
Një dëmtim i tillë përbën një rrezik jetësor për ekuipazhin pas rihyrjes në atmosferën e Tokës.
E varur nga një parashutë masive kuq e bardhë, kapsula hapësinore që mbante ekuipazhin e misionit Shenzhou-20 filloi të humbiste ngadalë lartësinë përpara se të ulej në terrenin shkretëtiror të zonës së uljes në Mongolinë e Brendshme (Kina veriore), sipas imazheve të transmetuara nga televizioni shtetëror kinez CCTV.
Me mbërritjen në orën 4:40 pasdite sipas orës lokale (10:40 të mëngjesit sipas orës greke), tre burrat, Chen Dong (46), Chen Zhongrui (41) dhe Wang Jie (36), “janë në gjendje të mirë shëndetësore”, siguroi agjencia hapësinore përgjegjëse për fluturimet me pilot, CMSA.
