Dhjetëra emigrantë hynë në Poloni përmes një tuneli sekret në kufirin me Bjellorusinë.

Më shumë se 180 migrantë hynë në Poloni përmes një tuneli sekret në një pyll në kufirin me Bjellorusinë, thanë sot rojet kufitare.

Rreth 130 prej tyre u kapën në Poloni pasi kalimi kufitar u zbulua dje, por pjesa tjetër po kërkohet, tha roja kufitare polake në një deklaratë.

Autoritetet publikuan një video të tunelit, vetëm 1.5 metra të lartë, të mbështetur nga shtylla druri dhe shufra metalike.

Polonia, një shtet anëtar i Bashkimit Evropian, është përballur me një krizë migrantësh në kufirin e saj me Bjellorusinë që nga viti 2021.

Ajo ka akuzuar Bjellorusinë dhe Moskën, aleatin e Minskut, për komplot për të destabilizuar Poloninë duke inkurajuar njerëzit, kryesisht nga Lindja e Mesme dhe Afrika, të kalojnë kufirin.

Bjellorusia dhe Rusia i kanë mohuar vazhdimisht këto akuza.

Roja kufitare tha se ky është tuneli i katërt i zbuluar këtë vit në rajonin Podlaskie.

Sipas deklaratës, rojet ndaluan një polak 69-vjeçar dhe një lituanez 49-vjeçar që kishin ardhur në zonë për të marrë migrantë.

“Hyrja e fshehur në pyll ndodhej afërsisht 50 metra (nga gardhi kufitar) në anën bjelloruse të kufirit, ndërsa dalja ishte afërsisht 10 metra nga gardhi në anën polake”, tha roja kufitare.

Oficerët përdorën sisteme elektronike për të ndjekur se sa njerëz kishin kaluar, ndërsa ushtria dhe policia janë të zënë duke kërkuar për migrantë që ende nuk janë gjetur, tha roja kufitare.

Polonia filloi ndërtimin e gardhit kufitar prej 180 kilometrash në vitin 2022.

Përshtati në Shqip S