Të martën (23 dhjetor), Volodymyr Zelensky zbuloi se disa draft dokumente, përfshirë ato që lidhen me garancitë e sigurisë, janë gati pas bisedimeve midis zyrtarëve amerikanë dhe ukrainas për t’i dhënë fund luftës në Ukrainë, duke shtuar se ato përmbushin shumë nga kërkesat e Kievit.
Gjatë fundjavës, zyrtarët amerikanë zhvilluan bisedime në Miami me delegacionet ukrainase dhe evropiane dhe zhvilluan diskutime të ndara me përfaqësuesit rusë në Florida, ndërsa Uashingtoni po teston mundësinë e një marrëveshjeje pas gati katër vitesh lufte.
Kievi, nën presionin e Shteteve të Bashkuara për të siguruar shpejt paqen, është përpjekur të balancojë propozimin fillestar, i cili shihet gjerësisht si i favorshëm për Moskën, duke i kërkuar asaj të lëshojë më shumë territor dhe të kufizojë aftësitë e saj ushtarake.
“Ata kanë punuar në mënyrë produktive me të dërguarit e Presidentit (Donald) Trump dhe disa draft dokumente janë tashmë gati”, shkroi Zelensky në një postim në platformën X pasi u informua mbi bisedimet nga negociatorët ukrainas Rustem Umerov dhe Andriy Khnatov.
“Në veçanti, këto janë dokumente që kanë të bëjnë me garancitë e sigurisë për Ukrainën, rindërtimin dhe një kornizë bazë për t’i dhënë fund kësaj lufte.”
Zyrtarët ukrainas kanë kërkuar garanci të forta nga aleatët për të parandaluar një pushtim tjetër rus pas një marrëveshjeje të mundshme paqeje.
“Pikat e sotme u vendosën në një mënyrë të tillë që të korrespondojnë me qëllimin e përfundimit efektiv të luftës dhe nevojën për të parandaluar një pushtim të tretë rus”, shtoi Zelensky.
Zelensky i bëri këto deklarata pasi Rusia nisi një sulm të madh ajror në sistemin energjitik të Ukrainës, duke vrarë të paktën tre persona dhe duke shkaktuar ndërprerje të zgjatura të energjisë elektrike, ndërsa ukrainasit përgatiteshin të festonin Krishtlindjet.
Gazeta ruse “Ivestia” citon zëdhënësin e Kremlinit, Dmitry Peskov, të ketë thënë se bisedimet midis Rusisë dhe Shteteve të Bashkuara në Miami mbi mënyrën e zgjidhjes së konfliktit në Ukrainë nuk duhet të perceptohen si një përparim.