Gazeta izraelite Maariv zbulon se një takim midis kryeministrit izraelit Benjamin Netanyahu dhe presidentit amerikan Donald Trump do të diskutojë hapat që lidhen me kalimin në fazën e dytë të marrëveshjes së armëpushimit që ka qenë në fuqi që nga 10 tetori.
Gazeta deklaroi se “Trump dhe Netanyahu po vendosin një vijë të re, të ngjashme me Vijën e Verdhë, për të lënë Hamasin pas”, duke shtuar se “ekziston një mirëkuptim midis Tel Avivit dhe Uashingtonit për të filluar rindërtimin e Gazës në zonat nën kontrollin izraelit, dhe pastaj ta zgjerojnë gradualisht atë në rreth 75 përqind të Rripit, në mënyrë që të krijojnë presion të vazhdueshëm civil mbi Hamasin pa pritur çarmatimin e tij”.
Maariv zbulon se rindërtimi i Gazës do të fillojë në zonat brenda Vijës së Verdhë, dhe më vonë, nëse Hamasi vazhdon të refuzojë të çarmatoset, zona e rindërtuar, e cila do të jetë nën kontrollin ushtarak izraelit, do të zgjerohet në rreth 75 përqind të sipërfaqes totale të Rripit të Gazës.
Maariv citoi burime të njohura me detajet e bisedimeve të thoshin se “Tel Avivi dhe Uashingtoni ranë dakord që çarmatimi i Hamasit nuk mund të jetë një parakusht për përpjekjet e rindërtimit, por ata gjithashtu nuk kanë ndërmend të lejojnë rindërtimin në zonat nën kontrollin e Hamasit”.
“Alternativa që po merret në konsideratë është të fillojë menjëherë rindërtimi civil, ekonomik dhe infrastrukturor vetëm në zonën ku ushtria izraelite është aktualisht e vendosur – afërsisht 53% e Rripit të Gazës – me një plan me faza për të zgjeruar Vijën e Verdhë për të përfshirë afërsisht tre të katërtat e Rripit të Gazës.
Sipas planit të propozuar, rindërtimi nuk do të fillojë menjëherë në të gjithë Rripin e Gazës, por do të vazhdojë në faza. Së pari, zonat e banimit, infrastruktura, shërbimet shëndetësore dhe furnizimet me ushqim do të krijohen në zonat nën kontrollin ushtarak izraelit. Këto zona do të bëhen qendra stabiliteti, rindërtimi dhe një ‘cilësie të përmirësuar jetese’, ndërsa zonat nën kontrollin e Hamasit do të mbeten të shkatërruara, pa infrastrukturë dhe të varura nga ndihma e kufizuar e huaj“, raportoi Maariv.
Maariv raportoi se vlerësimet izraelite tregojnë se rritja e presionit të brendshëm në Gaza do t’i bëjë banorët të preferojnë të zhvendosen në zonat e rehabilituara, ndërsa zonat nën kontrollin e Hamasit do të zbrazen gradualisht dhe do të mbeten kryesisht të populluara nga anëtarë të lëvizjes. Kështu, pa ndonjë paralajmërim zyrtar ose afat, do të lindë një dinamikë që inkurajon zgjerimin gradual të zonës së rehabilituar dhe rrjedhimisht zgjerimin e kontrollit ushtarak izraelit mbi të.
Sipas këtij plani, Vija e Verdhë do të zgjatet përmes operacioneve të kufizuara ushtarake kur të jetë e nevojshme, pa një kthim në luftime të mëdha. Izraeli vlerëson se Hamasi nuk është aktualisht gati të ndalojë këtë përparim të IDF-së dhe se çdo zgjerim do të shoqërohet së pari me operacione inxhinierike dhe sigurie, që synojnë kryesisht gjetjen dhe shkatërrimin e tuneleve, përpara se të fillojë puna e rindërtimit në zonat civile.
“Në të njëjtën kohë, zyrtarët izraelitë e bëjnë të qartë se nuk ka qëllim të zëvendësohet prania e IDF-së me një forcë stabilizimi ndërkombëtare. Për sa kohë që Hamasi mban një prani në Rripin e Gazës, edhe nëse kjo prani është në një zonë më të vogël, asnjë fuqi e huaj nuk do të ndërhyjë për të parandaluar IDF-në të veprojë. Prandaj, një organ ndërkombëtar, i udhëhequr nga Shtetet e Bashkuara dhe në koordinim të plotë me Izraelin, do të menaxhojë procesin e rindërtimit, duke u mbështetur në elementët civilë vendas, por përgjegjësia e sigurisë do t’i mbetet IDF-së.”
Maariv shpjegoi se “ky nuk është aneksim apo rivizatim kufijsh, por një model për një ‘Gazë të re’ që po ndërtohet nën kontrollin e vazhdueshëm ushtarak izraelit.”
Sipas kuptimeve të reja, derisa Hamasi të dorëzojë armët e tij, nuk do të ketë tërheqje izraelite, por krejt e kundërta: një zgjerim gradual i territorit të rehabilituar dhe kontrollit të tij, derisa të vendoset kontrolli mbi pjesën më të madhe të Rripit.
Maariv përfundon: “Mesazhi që Netanyahu shpreson t’i përcjellë Trumpit është i qartë: Izraeli është gati të vazhdojë me fazën e rindërtimit – por vetëm në kushte që e pengojnë Hamasin të mbetet, të rehabilitohet ose të përfitojë nga procesi.”
Por a do t’ja dalin me këtë plan të ri djallëzor? Realiteti ka treguar se përballë nuk kanë thjesht Hamasin, por një popull që paçka një gjenocidi mbi të, po jua thyen hundët me rezistencë, vitalitet e ideal. /tesheshi.com/