Kina ka shfuqizuar një përjashtim tatimor prej tre dekadash mbi kontraceptivët dhe pajisjet që nga 1 janari i këtij viti, hapi më i fundit në një seri hapash për të luftuar rënien e shkallës së lindjeve.
Dhe kjo ndodh në megashtetin ku vite më parë do kufizohej lindshmëria me diktat shtetëror. Por tani janë penduar mbi atë lloj gomarrllëku me pasoja në ekonomi, ku njeriu është edhe kapital.
Prezervativët dhe pilulat kontraceptive tani i nënshtrohen një takse mbi vlerën e shtuar prej 13 përqind, shkalla standarde për shumicën e mallrave të konsumit.
Ky veprim vjen ndërsa Pekini kërkon të rrisë shkallën e lindjeve në ekonominë e dytë më të madhe në botë. Popullsia e Kinës ra për të tretin vit radhazi në vitin 2024, dhe ekspertët paralajmërojnë se rënia do të vazhdojë.
Vitin e kaluar, Kina përjashtoi subvencionet për kujdesin ndaj fëmijëve nga tatimi mbi të ardhurat, si dhe futi një subvencion vjetor për kujdesin ndaj fëmijëve. Kjo u parapri nga disa iniciativa në vitin 2024, duke përfshirë stimuj për kolegjet dhe universitetet për të paraqitur martesën, dashurinë, pjellorinë dhe familjen në një dritë pozitive përmes “edukimit të dashurisë”.
Gjithashtu, udhëheqësit kryesorë të Kinës u zotuan përsëri muajin e kaluar në Konferencën vjetore Qendrore të Punës Ekonomike për të promovuar “qëndrime pozitive ndaj martesës dhe lindjes së fëmijëve” në mënyrë që të stabilizohet shkalla e lindjeve.
Shkalla e lindshmërisë në Kinë ka qenë në rënie për dekada si rezultat i “politikës së një fëmije” të vendit nga viti 1980 deri në vitin 2015 dhe urbanizimit të shpejtë. Kostot e larta të kujdesit për fëmijët dhe arsimit, si dhe pasiguria në punë dhe një ekonomi në ngadalësim, kanë dekurajuar gjithashtu shumë të rinj kinezë nga krijimi i një familjeje, raporton Reuters.
Megjithatë, është një ligjësi e provuar tashmë dhe vështirë e sfidueshme: zhvillimi, rritja ekonomike, sjell jeta moderne; jeta moderne sjell minimizim të familjes, si pasojë pra dhe më pak lindshmëri. /tesheshi.com/
