Donald Trump mohon thashethemet për probleme shëndetësore, duke deklaruar se shëndeti i tij është “perfekt” dhe se ai “e kaloi testin njohës”.
“Mjekët e Shtëpisë së Bardhë sapo njoftuan se unë jam në shëndet të përsosur dhe se nuk dështova (domethënë, iu përgjigja 100% të pyetjeve saktë) në testin tim njohës për herë të tretë radhazi”, shkroi presidenti 79-vjeçar në Truth Social.
Duke iu përgjigjur kritikave në një intervistë me Wall Street Journal të enjten, ai ia atribuoi mavijosjet në dorë dozës së aspirinës që merr çdo ditë.
“Ata thonë se aspirina është e dobishme për hollimin e gjakut dhe unë nuk dua gjak të trashë që të më rrjedhë nëpër zemër. Dua gjak të mirë dhe të hollë që të më rrjedhë nëpër zemër”, tha presidenti amerikan, duke justifikuar marrjen e tij ditore prej 325 miligramësh aspirinë, shumë më tepër sesa rekomandojnë mjekët.
Presidenti amerikan gjithashtu mohoi se kishte rënë në gjumë gjatë ngjarjeve publike, duke akuzuar median se e kishte fotografuar duke “pulitur sytë”.