Presidenti i SHBA-së, Donald Trump, i ka dërguar një letër duke e ftuar Presidentin turk, Recep Tayyip Erdoğan, të bëhet anëtar i Këshillit të Paqes, i cili do të mbikëqyrë qeverisjen e përkohshme të Gazës, mes një armëpushimi të brishtë që nga tetori, njoftoi sot, të shtunën (17/1), presidenca turke.
“Këshilli i Sigurimit i Kombeve të Bashkuara, nëpërmjet Rezolutës 2803, vendosi të mbështesë Planin Gjithëpërfshirës për Përfundimin e Konfliktit në Gaza, të shpallur nga Presidenti i SHBA-së, Donald Trump.
Në këtë kontekst, në Gaza po krijohet një Këshill Paqeje dhe organe përgjegjëse për sigurinë dhe rindërtimin. Më 16 janar 2026, Presidenti i SHBA-së, Donald Trump, si president themelues i Këshillit të Paqes, dërgoi një letër duke e ftuar Presidentin tonë, Recep Tayyip Erdoğan, të bëhet anëtar themelues i Këshillit të Paqes”, tha Burhanettin Duran, kreu i Drejtorisë së Komunikimit të Presidencës Turke, në një deklaratë të publikuar në X.
Ndërkohë, Ministri i Jashtëm egjiptian Badr Abdelati deklaroi në një konferencë për shtyp se po shqyrton ftesën e Donald Trump drejtuar Presidentit egjiptian Abdel Fattah al-Sisi për të marrë pjesë në të ashtuquajturin “Këshilli i Paqes” për Gazën.
Duhet të theksohet se dje, të premten (16 janar), Shtëpia e Bardhë njoftoi disa nga anëtarët e Këshillit të Paqes, të cilin Trump do ta kryesojë.
- Sipas njoftimit të Shtëpisë së Bardhë, Këshilli i Paqes do të përfshijë Sekretarin e Shtetit të SHBA-së Marco Rubio, të dërguarin e Trump Steve Witkoff, dhëndrin e tij Jared Kushner, ish-kryeministrin britanik Tony Blair, biznesmenin miliarder Mark Rowan, Presidentin e Bankës Botërore Ajay Banga dhe këshilltarin politik Robert Gabriel.
Diplomati bullgar Nickolay Mladenov do të marrë postin e Përfaqësuesit të Lartë për Gazën.
Gjeneral Major Jasper Jeffers është emëruar komandant i Forcës Ndërkombëtare të Stabilizimit në enklavën palestineze.
Ministri i Jashtëm turk Hakan Fidan u njoftua si një nga anëtarët e “Këshillit Ekzekutiv për Gazën”, së bashku me Marco Rubio, Steve Witkoff, Tony Blair, Jared Kushner, Mark Rowan, si dhe diplomatin e lartë të Katarit Ali Thawadi, shefin e inteligjencës egjiptiane Hassan Rashad, Ministrin e Bashkëpunimit Ndërkombëtar të Emirateve të Bashkuara Arabe Reem al-Hashimi, biznesmenin izraelito-qipriot Yakir Gabbay, ish-koordinatoren humanitare të OKB-së Sigrid Kaag dhe Nickolay Mladenov, ish-i dërguarin e OKB-së në Lindjen e Mesme/CNN