Kina është zotuar të ofrojë “mbështetje dhe ndihmë” për Kubën përballë kërcënimeve të përsëritura nga Shtetet e Bashkuara, duke dënuar presionin e Uashingtonit, i cili “minon paqen dhe stabilitetin rajonal”.
“Kina shpreh shqetësim të thellë dhe kundërshtim ndaj veprimeve të Shteteve të Bashkuara” ndaj Kubës, tha sot në një konferencë për shtyp zëdhënësi i Ministrisë së Jashtme kineze, Guo Jiaqun.
- “Ne i bëjmë thirrje Shteteve të Bashkuara […] të ndalojnë së dëmtuari paqen dhe sigurinë rajonale”, vazhdoi ai, duke i bërë thirrje gjithashtu Uashingtonit që “të heqë menjëherë bllokadën dhe sanksionet kundër Kubës”.
“Kina do të vazhdojë t’i ofrojë Kubës të gjithë mbështetjen dhe ndihmën e mundshme”, përfundoi zëdhënësi i Ministrisë së Jashtme kineze.
Të shtunën, Presidenti kubanez Miguel Díaz-Canel bëri thirrje për përgatitje ushtarake të vendit si një mjet për të penguar një sulm të mundshëm të SHBA-së, pas kërcënimeve nga Uashingtoni.
Presidenti amerikan Donald Trump përshkallëzoi kërcënimet e tij kundër Kubës pas operacionit ushtarak amerikan në Karakas, i cili çoi në arrestimin e Presidentit venezuelian Nicolas Maduro, një aleat kyç i Havanës dhe furnizuesit të saj kryesor të energjisë.
Tridhjetë e dy ushtarë kubanë u vranë gjatë këtij operacioni, disa prej të cilëve ishin pjesë e ekipit të sigurisë së Maduros.
“Zero” Naftë dhe Para për Kubën
Donald Trump i kërkoi Kubës të pranonte një “marrëveshje” “para se të jetë tepër vonë”, natyrën e së cilës ai nuk e specifikoi.
- “Nuk do të ketë më naftë ose para që shkojnë në Kubë: zero!” theksoi ai.
Javën e kaluar, Politico raportoi se administrata Trump po shqyrton një bllokadë detare për t’i dhënë fund të gjitha importeve të naftës në Kubë, duke cituar burime të njohura me çështjen./CNN
