Zyrtarët iranianë dhe amerikanë përfunduan bisedimet në Oman në një përpjekje për të kapërcyer mosmarrëveshjet e tyre të thella mbi programin bërthamor të Teheranit dhe për të shmangur një luftë tjetër në Lindjen e Mesme.
Televizioni shtetëror iranian raportoi vonë këtë pasdite se bisedimet, të mbajtura në kryeqytetin e Omanit, Muscat, kishin përfunduar dhe se një raund tjetër ishte planifikuar për ditët në vijim.
Pas bisedimeve bërthamore të mbajtura sot në Oman me Shtetet e Bashkuara, Ministri i Jashtëm iranian Abbas Araghchi u tha gazetarëve se rezultati ishte “pozitiv” dhe se palët ranë dakord të vazhdonin negociatat, por vuri në dukje se koha dhe vendi i saktë i raundit të ardhshëm nuk ishin vendosur ende.
Aragchi tha se palët po punojnë për të ndërtuar besim të ndërsjellë dhe se nëse ky trend vazhdon, mund të krijohet një kornizë më e qartë për negociatat.
Një zyrtar iranian i tha më parë Reuters se kërkesat e Iranit ishin transmetuar në Shtetet e Bashkuara nëpërmjet Omanit. Zyrtari tha se negociatat indirekte ka të ngjarë të kenë filluar pas një takimi midis kryenegociatorit amerikan dhe Ministrit të Jashtëm të Omanit.
Dy ekipet diplomatike u drejtuan nga Ministri i Jashtëm iranian Abbas Araghchi dhe i dërguari special i Donald Trump, Steve Witkoff, raportoi Al Jazeera. Dhëndri i Presidentit të SHBA-së Donald Trump, Jared Kushner, pritet gjithashtu të marrë pjesë në bisedime.
Komandanti ushtarak amerikan thuhet se po merr pjesë gjithashtu në bisedime, ndërsa të dhënat e gjurmimit të fluturimit tregojnë se një aeroplan i Forcave Ajrore Amerikane, i përdorur për të transportuar komandantë të rangut të lartë, u ul në Muscat këtë mëngjes.
Programi bërthamor i Iranit në fokus
Rifillimi i bisedimeve midis dy vendeve synon të zgjidhë çështjen e pasurimit të uraniumit të Teheranit. Megjithatë, Uashingtoni do të vërë në tryezën e negociatave edhe raketat balistike iraniane, mbështetjen për forcat e tij të armatosura në rajon dhe trajtimin e “popullit të vet”, siç deklaroi të mërkurën (4 shkurt) Sekretari i Shtetit i SHBA-së, Marco Rubio.
Sipas Reuters, Irani tha se dy diplomatët do të diskutojnë çështjen bërthamore vetëm në Muscat.
“Irani hyn në diplomaci me sytë hapur dhe me kujtimin e vitit të kaluar fort në mendje. Ne marrim pjesë me mirëbesim dhe mbrojmë me forcë të drejtat tona. Angazhimet duhet të mbahen”, tha Araghchi në një postim në X (ish Twitter) të premten.
Udhëheqja e Teheranit vazhdon të ketë frikë se Trump mund ta godasë Iranin pas përforcimit ushtarak të Marinës Amerikane pranë Iranit.
“Ndërsa këto negociata zhvillohen, do të doja t’i kujtoja regjimit iranian se presidenti ka shumë mundësi në dispozicion, përtej diplomacisë, si udhëheqësi i ushtrisë më të fuqishme në historinë e botës”, u tha gazetarëve të enjten (5 shkurt) zëdhënësja e Shtëpisë së Bardhë, Carolyn Leavitt.
Irani është zotuar të përgjigjet ndaj çdo sulmi ushtarak dhe i paralajmëroi vendet fqinje arabe të Gjirit që strehojnë baza amerikane se ato do të jenë në shënjestër nëse përfshihen në një sulm.
“Vija e Kuqe” e Teheranit
Irani ka vendosur “vija të kuqe” specifike në diskutimet rreth programit të tij të raketave.
Ai ka përjashtuar kategorikisht diskutimet rreth “aftësive të tij mbrojtëse, duke përfshirë raketat dhe rrezet e tyre të veprimit”.
Në një shfaqje force, televizioni shtetëror iranian transmetoi vetëm disa orë para bisedimeve se “një nga raketat balistike me rreze të gjatë veprimi më të përparuara të vendit, Khorramshahr-4”, ishte vendosur në një nga “qytetet” e mëdha nëntokësore të Gardës Revolucionare/CNN
