Zvicra do të mbajë një votim historik mbi propozimin e një partie të krahut të djathtë për të kufizuar popullsinë e vendit në dhjetë milionë.
Propozimi, i paraqitur nga Partia Popullore Zvicerane (SVP), do të kërkonte që qeveria të vepronte përpara se popullsia, aktualisht në 9.1 milionë, të rritej në kufirin e sipërm të propozuar prej dhjetë milionësh.
Nëse ky propozim miratohet, qeveria zvicerane do të duhet të mohojë hyrjen e të sapoardhurve, duke përfshirë azilkërkuesit dhe familjet e shtetasve të huaj. Nëse popullsia arrin dhjetë milionë, qeveria do të detyrohet të ndërpresë marrëveshjen e lëvizjes së lirë me Bashkimin Evropian, partnerin më të madh tregtar të Zvicrës.
Edhe pse Zvicra nuk është anëtare e BE-së, kombi është i integruar përmes mbi 120 marrëveshjeve dypalëshe, të cilat i japin asaj akses në tregun e vetëm të BE-së dhe lëvizjen e lirë të njerëzve dhe tregtinë e mallrave.
SVP pretendon se Zvicra po përjeton një “shpërthim të popullsisë” që po ushtron presion mbi shërbimet publike, duke e tendosur infrastrukturën dhe duke rritur qiratë.
Një sondazh i kryer vitin e kaluar nga agjencia zvicerane e kërkimit të opinionit publik Leewas tregon se ky propozim ka mbështetje publike, raporton CNN.
Në një postim në rrjetin X, SVP u bëri thirrje votuesve zviceranë të votojnë në favor të propozimit më 14 qershor, duke ndarë një imazh të njerëzve të pasur që ngrinin dolli me shampanjë në një fron mbi një turmë punëtorësh të pakënaqur, e cila dukej se ishte gjeneruar nga inteligjenca artificiale. Mbishkrimi shkruante: “Një elitë e vogël ekonomike përfiton nga imigracioni i tepërt – shumica e popullsisë zvicerane vuan”. /tesheshi.com/
