UEFA ka njoftuar nisjen e një hetimi disiplinor për ngjarjet e ndodhura në ndeshjen e Champions League, mes Benficas dhe Real Madrid.
Një Inspektor i Etikës dhe Disiplinës është caktuar për të analizuar akuzat për sjellje diskriminuese në stadiumin “Da Luz”, ku u aktivizua protokolli kundër racizmit pas denoncimit të Vinicius Junior.
Sipas pretendimeve të brazilianit, lojtari i Benficas, Gianluca Prestianni, përdorur fyerje raciste ndaj sulmuesit të Realit, akt ky që është dëshmuar edhe nga Kylian Mbappé. Ky i fundit ka deklaruar se ka dëgjuar lojtarin argjentinas duke e fyer disa herë bashkëlojtarin e tij, ndërkohë që vetë Prestianni i ka mohuar akuzat.
Komiteti i Etikës do të shqyrtojë provat filmike dhe pritet të marrë dëshmitë e protagonistëve dhe dëshmitarëve të pranishëm pranë incidentit. Vështirësia kryesore e hetimit qëndron në mungesën e një evidence të qartë pamore, pasi lojtari i Benficas ka mbuluar gojën gjatë momentit të debatit.
Megjithatë, rregullorja e UEFA-s është mjaft strikte në raste të tilla; neni 14 parashikon sanksione të rënda që nisin nga pezullimi me të paktën dhjetë ndeshje për këdo që fyen dinjitetin njerëzor mbi baza racore.
