Qeveria e krahut të djathtë e Suedisë, e zgjedhur në vitin 2022 me një premtim për të shtrënguar politikën e imigracionit të vendit, kohët e fundit paraqiti një sërë reformash që kërkon të miratojë para zgjedhjeve parlamentare të shtatorit. Kërkesa e re do ta bënte më të lehtë revokimin e lejeve të qëndrimit nga emigrantët.
“Respektimi i ligjeve dhe rregullave është i vetëkuptueshëm, por duhet të jetë gjithashtu i vetëkuptueshëm se ne bëjmë çmos për të jetuar me përgjegjësi dhe për të mos dëmtuar vendin tonë”, tha ministri i Imigracionit Johan Forssel në një konferencë për shtyp.
“Nëse, për shembull, nuk i paguani borxhet tuaja, nëse nuk mund t’i zbatoni vendimet e autoriteteve suedeze, nëse abuzoni me sistemin e sigurimeve shoqërore, nëse merrni një leje qëndrimi në Suedi me mjete të parregullta (…) atëherë nuk keni të drejtë të jetoni këtu”, shtoi ai.
Shembuj të tjerë të cituar nga qeveria përfshijnë dhe mospagimin e taksave ose mospagimin e gjobave.
“Deklaratat – domethënë, ajo që thotë ose shpreh një person – nuk duhet të shihen në vetvete si provë e pandershmërisë, por mund të jenë një tregues i, për shembull, lidhjeve me ekstremizmin e dhunshëm, i cili më pas mund të jetë një tregues i mungesës së moralit”, u tha gazetarëve Ludwig Aspling, zëdhënës i imigracionit për partinë Demokratët e Suedisë kundër imigracionit, e cila mbështet qeverinë.
Qeveria po propozon gjithashtu të revokojë lejet e qëndrimit në raste të tjera, të tilla si kur migrantët konsiderohen kërcënim ose nëse vërtetohet se ata kanë gënjyer në aplikimin e tyre për leje qëndrimi.
Nëse miratohen nga parlamenti, ndryshimet do të hyjnë në fuqi më 13 korrik. /tesheshi.com/
